ТОШКЕНТ, 24 апр — Sputnik. Евроосиё иқтисодий комиссияси (ЕИК) ва Осиё ва Тинч океани иқтисодий ва ижтимоий комиссияси (ESCAP) ҳамкорликни янада кенгайтириш ва янги англашув меморандумини имзолашга тайёрлигини тасдиқлади, дея хабар берди комиссия матбуот хизмати.
ЕИКнинг иқтисодиёт ва молия сиёсати вазири Бахит Султанов Таиландда Осиё ва Тинч океани иқтисодий ва ижтимоий комиссияси сессиясида иштирок этди.
“Евроосиё иқтисодий иттифоқида кечаётган интеграция жараёнларининг таъсири унга аъзо давлатлардан ташқарида ҳам қўшни минтақалар, жумладан, Марказий Осиёга ҳам ижобий таъсир кўрсатмоқда, — деди Бахит Султанов.
Унинг сўзларига кўра, Иттифоқ товарлар, хизматлар, капитал ва ишчи кучининг эркин ҳаракатланиши, сармоявий ҳамкорлик, самарали транспорт-логистика тармоғини шакллантириш билан боғлиқ бир қатор асосий жараёнларни таъминлаш орқали Евроосиё минтақасида барқарор ривожланишга ёрдам беради.
Ташриф доирасида ЕИК вазири БМТ бош котиби ўринбосари ва ESCAP Ижрочи котиби билан учрашди. Барқарор ривожланиш мақсадларини амалга ошириш контекстида ҳамкорликнинг долзарб масалалари муҳокама қилинди.
Қайд этилишича, ESCAP комиссия, шунингдек, ЕОИИ мамлакатлари билан турли йўналишларда ҳамкорликни кенгайтиришдан манфаатдор. Бахит Султанов замонавий синовларни енгиш ва глобал ўзгаришларга мослашиш учун ҳамкорликни фаоллаштириш муҳимлигини таъкидлади.
“Ўзаро англашув меморандумини тузишга келсак, томонлар у глобал ўзгаришларга мослашиш зарурлигини инобатга олган ҳолда ҳамкорликнинг янги устувор йўналишлари ва мақсадларини ўз ичига олишини тасдиқлади. Ҳужжатнинг имзоланиши ЕИК ва ESCAP ўртасидаги шерикликни мустаҳкамлашда муҳим қадам бўлади”, — дейилади хабарда.
Маълумот учун, БМТнинг Осиё ва Тинч океани учун иқтисодий ва ижтимоий комиссияси (ESCAP) 53 та давлатни ўз ичига олади, жумладан Арманистон, Қозоғистон, Қирғизистон, Россия ва Ўзбекистон.