TOШКЕНТ, 21 апр — Sputnik. АҚШ Ҳукумат Самарадорлиги Департаменти (DOGE) раҳбари, тадбиркор Илон Маск АҚШ ҳукуматидаги ишини тарк этмоқчи, чунки у "чапдан ҳужумлар" дан чарчаган. Бу ҳақда Washington Post газетаси аноним манбага таяниб хабар берди, деб ёзмоқда РИА Новости.
Нашрда қайд этилганидек, Маскнинг махсус давлат ходими сифатидаги мақоми шу йилнинг май ойида тугайди ва бу муддат узайтириладими ёки йўқми, ҳозирча маълум эмас.
“(Маск – таҳр.) чапдан келаётган нохуш ва ахлоққа зид ҳужумлар оқими деб ҳисоблаган нарсадан чарчагани учун кетмоқчи”, — дейилади газета хабарида.
Шу билан бирга, Маск ҳозирда у раҳбарлик қилаётган DOGE компаниясининг келажакдаги иши ҳақида қайғурмайди, чунки унинг жамоаси аъзолари аллақачон "кўплаб федерал агентликларда" ўзини намоён қилган, деб ёзади газета. Оқ уйнинг исмини ошкор этмаган юқори мартабали мулозимининг айтишича, DOGE "ўзлари учун гапирадиган" тарихий натижаларга эришган.
АҚШ президенти Дональд Трамп томонидан яратилган DOGE “беҳуда сарф-харажатларни қисқартириш ва федерал агентликларни қайта қуриш” учун мўлжалланган. АҚШ Вакиллар палатаси спикери Майк Жонсон аввалроқ Ҳукумат самарадорлиги идораси АҚШ ҳукуматининг Конгресс томонидан тасдиқланмаган “ҳайратланарли” харажатларини аниқлаганини айтган эди.