ТОШКЕНТ, 18 апр — Sputnik. Ўтган йилнинг май ойида Россия президенти Владимир Путиннинг Тошкентга ташрифи давомида Ўзбекистонда кам қувватли АЭС қуриш ҳақида келишиб олинган эди.
“Ўзатом” агентлиги ҳузуридаги АЭС қурилиш дирекцияси директори ўринбосари Отабек Аманов Sputnik матбуот марказида бўлиб ўтган матбуот анжуманида АЭС қурилиш жараёни қандай кетаётганини айтиб берди.
"Ҳозирги кунда танланган АЭС қурилиш майдончасида инженер-қидирув ишлари амалга оширилмоқда. Куни кеча АЭС қуриш бўйича қурилиш-монтаж базасини барпо этиш бўйича ишлар бошланди. Ундан ташқари лойиҳалаштириш ишлари давом этмоқда. Бунда АЭС жойлашуви ва уни барпо этиш бўйича лицензиялар олишни назарда тутади. Бу ишлар АЭСни ўз вақтида ишга туширишга катта таъсир кўрсатади", - дейди мутахассис.
Унинг сўзларига кўра, келажакда республикада қазиб олинган урандан атом электр станциялари учун ёқилғи хомашёси сифатида фойдаланишга келишиб олинган.
Шунингдек, Жиззах вилоятидаги атом электр станцияси қурилишига Ўзбекистон компаниялари ҳам жалб этилади. Улар цемент, арматура, металл конструкциялар ва электр кабель маҳсулотлари етказиб бериш билан шуғулланади, дея тушунтирди Аманов.
Ўзбекистон уран рудаси захиралари бўйича дунёда 10-ўринда, қазиб олиш ҳажми бўйича эса 5-ўринда туради. Ўзбекистонда ишлаб чиқарилган уран мамлакатда ишлатилмайди ва экспорт қилинади.