ТОШКЕНТ, 10 апр – Sputnik. Бугун эрталаб БААда Москва ва Вашингтон маҳбуслар алмашинувини амалга оширди, деб ёзмоқда WSJ Марказий разведка бошқармаси директори Жон Ретклиффга таяниб.
“Бугун президент Трамп Россиядан яна бир <...> америкаликни қайтарди”, - деди у.
АҚШ президентининг Миллий хавфсизлик бўйича маслаҳатчиси Майк Уолтцнинг газетага айтишича, Украина Қуролли кучларига хайрия қилгани учун давлатга хиёнатда айбланиб, 12 йилга колонияга ҳукм қилинган Ксения Карелина Вашингтонга топширилган.
Нашр манбаларининг аниқлик киритишича, гўёки экспорт чекловларини бузганлик иши бўйича ҳибсга олинган Артур Петров Россияга қайтмоқда.
WSJ маълумотларига кўра, алмашинув ишончни мустаҳкамлаш белгиси бўлди, чунки иккала томон ҳам Украинадаги можарога барҳам бериш бўйича келишувга эришмоқчи. Алмашинув Москва ва Вашингтон ўртасидаги алоқа йўналишларини очиқ сақлаш муҳимлигини таъкидлайди, деди Марказий разведка бошқармаси вакили.
Карелина иши
2024 йил февраль ойида ФХХ Екатеринбургда қўш Россия ва АҚШ фуқаролигига эга бўлган 32 ёшли Лос-Анжелесда яшовчи шахс Украина Қуролли кучлари эҳтиёжлари учун пул ўтказганликда гумон қилиниб ҳибсга олингани ҳақида хабар берди. Аёл давлатга хиёнатда айбланиб, ҳибсга олинган. Тергов маълумотларига кўра, у Украина армияси учун тактик тиббий буюмлар, жиҳозлар, қурол ва ўқ-дорилар сотиб олиш учун пул юборган.
Карелина 12 йилга озодликдан маҳрум қилиш жазосини умумий режимдаги жазони ижро этиш колониясида ўташга ҳукм қилинди, шунингдек, 300 минг рубль миқдорида жаримага тортилди. У ўз айбини тан олган.
Петров иши
Петров 2023 йил август ойи охирида Кипрда ҳибсга олинган ва у ердан АҚШга экстрадиция қилинган.
Америка ҳуқуқ-тартибот идоралари маълумотларига кўра, у доимий равишда Россия ва Кипрда истиқомат қилиб, Санкт-Петербургдаги "Электроком ВПК" компаниясида ишлаган, Америка Адлия вазирлиги уни Россия ҳарбий-саноат комплекси учун микроэлектроника етказиб берувчиси деб атаган.
АҚШ прокуратурасига кўра, Петров гўёки экспорти чекланган Америка маҳсулотларини сотиб олиш билан шуғулланган ва охирги харидор Россия компанияси эканлигини яширган. Унга қўйилган айбловларга асосланиб, у 20 йилдан ортиқ қамоқ жазосига ҳукм қилинган.
Унинг ўзи ҳам ўз ишини сиёсий мотивли деб атаган.