ТОШКЕНТ, 4 апр — Sputnik. Ўзбекистон Олий Мажлиси Сенати раиси Танзила Нарбаева Парламентлараро иттифоқнинг 150-юбилей ассамблеяси арафасида Осиё Парламент Ассамблеяси бош котиби Муҳаммад Ризо Мажидий билан учрашди. Бу ҳақда Сенат матбуот хизмати хабар берди.
Учрашувда Ўзбекистон парламенти ва Осиё Парламент Ассамблеяси ўртасидаги ҳамкорликни ривожлантириш истиқболлари, шунингдек, экология, барқарор ривожланиш ва халқаро сиёсат соҳаларида ўзаро ҳамкорликни мустаҳкамлаш масалалари муҳокама қилинди.
В Сенате состоялась встреча с Генеральным секретарем Азиатской Парламентской Ассамблеи
© Сената Олий Мажлиса
Ҳамкорликни янада ривожлантиришнинг устувор йўналишлари, шу жумладан экологик хавфсизлик, “яшил” технологиялардан фойдаланиш, камбағалликни қисқартириш, сув таъминотини яхшилаш ва атроф муҳитни муҳофаза қилиш масалалари ҳам кўриб чиқилди.
Муҳаммад Ризо Мажидий президент Шавкат Мирзиёев раҳбарлигида амалга оширилаётган сиёсий ва иқтисодий ислоҳотларни амалга оширишда, айниқса, янги конституциявий ўзгаришлар ва “Ўзбекистон – 2030” тараққиёт стратегияси доирасида Ўзбекистон эришган ютуқларни алоҳида таъкидлаб ўтди.
Бундан ташқари, Ассамблеяга аъзо мамлакатлар ўртасида маданий-гуманитар ҳамкорликни кенгайтириш, шунингдек, зиёрат туризмини ривожлантириш масалалари муҳокама этилди. Туризм соҳасидаги ҳамкорликни чуқурлаштириш, шу жумладан, тажриба алмашиш ва маданий алоқаларни мустаҳкамлашга тайёрлик билдирилди.
Учрашув якунида мавжуд ташаббуслар доирасида фаол ишларни давом эттириш ва янги қўшма лойиҳаларни ишлаб чиқишга келишиб олинди.