Мигрант болалар рус тилидан тестларга неча фоиз тўғри жавоб бериши кераклиги маълум бўлди

ТОШКЕНТ, 2 апр — Sputnik. Мигрантларнинг фарзандлари Россия мактабларига қабул қилиниши учун рус тилидан имтиҳонда топшириқларнинг 90 фоизига тўғри жавоб бериши керак. Россия Давлат думаси раиси Вячеслав Володин ўзининг Telegram-каналида маълум қилди.

“Ўтган йили сизнинг сўровларингиз асосида Давлат Думаси депутатлари миграция сиёсатини такомиллаштиришга қаратилган 14 та қонунни фаол ишлаб чиқди ва қабул қилди. Улардан мигрант болаларни мактабларга қабул қилиш шартларини белгиловчи охиргиси кучга кирди. Ички ишлар вазирлиги маълумотларига кўра, 2025 йил 1 январь ҳолатига кўра, Россияда 783 593 нафар вояга етмаган мигрантлар бор”, — деб ёзади Вячеслав Володин.

Эндиликда мигрантларнинг фарзандларини мактабларга қуйидаги ҳолларда қабул қилиш тақиқланади:

уларнинг мамлакат ҳудудида мавжудлиги қонунийлигини текширмасдан;

рус тилини етарлича билмаган тақдирда.

“Илгари биз ушбу қоидаларни қўллаш масалаларини муҳокама қилдик. Рособрнадзорнинг рус тили бўйича имтиҳондан муваффақиятли ўтиш учун мигрантларнинг фарзандлари 30 фоиз тўғри жавоб бериши кераклиги ҳақидаги дастлабки таклифига рози бўлмадик. У қайта ишланди. Бугунги қарор мактабга қабул қилиниш учун 90 фоиз тўғри жавоб беришини назарда тутади”, — дея аниқлик киритди Володин.

Рус тилини, шу жумладан, оғзаки қисмини синовдан ўтказиш учун намуна материаллари ҳар бир таълим даражаси учун индивидуал равишда ишлаб чиқилади.

Қабул учун:

1-синфда 10 та топшириқдан 9 тасига тўғри жавоб бериш керак;

2-5 синфларда — 20 та топшириқдан 18 тасига;

6-9 синфларда — 22 та топшириқдан 20 тасига;

10-11 синфларда — 24 та топшириқдан 22 тасига.

Рособрнадзорнинг фикрига кўра, бу боланинг рус тилини билиш даражасини объектив баҳолаш, шунингдек, мактаб ўқув дастурини муваффақиятли ўзлаштириш, мослашиш ва ижтимоийлашув имкониятини яратиши керак.

“Биз масалани назоратдан олиб ташламаймиз! Биз ушбу стандартларнинг бажарилишини таҳлил қилишимиз, тест топшириқларининг мазмуни, мигрант болаларнинг рус тилини билиш даражасини баҳолаш нуқтаи назаридан уларнинг сифати ва самарадорлиги бўйича ҳудудлар ва ўқитувчилар жамоасининг фикрини билишимиз керак”, — дея қайд этди Вячеслав Володин.

Мигрант болаларнинг рус тилини билиш даражасини синовдан ўтказиш санаси маълум бўлди

24 Декабр 2024, 15:15