ТОШКЕНТ, 2 апр — Sputnik. Ҳиндистонда Ўзбекистон билан яқин ҳамкорлик қилишга ихтисослашган туристик компания фаолияти йўлга қўйилди, дея хабар берди "Дунё" АА.
Ўзбекистон элчиси Сардор Рустамбоев иштирокида Ҳиндистоннинг Керала штатида жойлашган Кожикоде шаҳрида "Futuh Holidays" сайёҳлик компаниясининг очилиш маросими бўлиб ўтди.
“Мазкур компания ўз фаолияти доирасида Керала ва унга қўшни бўлган штатлардан сайёҳлар гуруҳларининг Ўзбекистонга саёҳатларини ташкил қилишга ихтисослашган”, — дейилди хабарда.
Қайд этилишича, 2024 йилда 80 мингдан ортиқ ҳиндистонлик сайёҳ Ўзбекистонга сафар қилган, бу 2023 йилга нисбатан қарийб икки баравар кўп.
“Жорий йил ушбу кўрсаткични 100 минг нафарга етказиш йўлида тизимли чора-тадбирлар кўрилмоқда. Шунингдек, икки мамлакат ўртасидаги ҳаво қатновлари сони ҳам сўнгги бир ярим йилда 1,5 бараварга кўпайиб, ҳафтасига 18 тани ташкил қилмоқда. Яқин истиқболда ўзаро парвозлар кўлами 24 тага етказилади”, — дея қайд этилган хабарда.
Компанияси вакилларининг айтишича, Кожикодеда истиқомат қиладиган мусулмонлар жамияти аъзолари Имом Бухорий, Имом Термизий, Имом Мотуридий ва бошқа буюк алломалар ватани бўлган Ўзбекистондаги тарихий ва ислом обидаларини зиёрат қилишга катта қизиқиш билдиради.