ТОШКЕНТ, 14 март – Sputnik. АҚШ президенти Доналд Трамп чоршанба куни Владимир Путин билан бўлиб ўтган суҳбатда Курск вилоятида қуршаб олинган Украина қуролли кучларининг ҳаётини сақлаб қолишни сўраган. Бу ҳақида унинг ўзи Truth Social ижтимоий тармоғида маълум қилди.
"Биз жуда сермазмун суҳбат қилдик, бу қонли уруш ваниҳоят тугашига яхши имкониятлар бор. Лекин айни шу дақиқада минглаб Украина аскарлари Россия қўшинлари томонидан тўлиқ қуршаб олинган, жуда оғир ва ҳимоясиз ҳолатда. Мен президент Путиндан уларнинг ҳаётини сақлаб қолишни қаттиқ илтимос қилдим", - деди Трамп ўз баёнотида.
Россия президенти 13 март куни бўлиб ўтган матбуот анжуманида Курск вилоятининг Украина томонидан эгаллаб олинган ҳудудининг 86 % озод қилинганини ва у ердаги Украина аскарлари деярли тўлиқ қуршаб олинганини маълум қилган эди.
Россия Мудофаа вазирлиги хабарига кўра, Курск вилоятида Украина Қуролли кучларининг йўқотишлари 67 минг кишидан ошган.
Украина 2024 йилнинг август ойида Россия чегарасини кесиб ўтиб Курск вилоятининг бир қисмини эгаллаб олган эди. Киев ҳукумати кейинчалик бу ҳудудлар эвазига Россия қўшинлари назорати остига ўтган ерларга алмаштиришни режалаштирган эди. Лекин музокаралар бошлангунича Россия ўз ерларини тўлиқ озод қилди, у ердаги Украина қўшинлари эса қуршовда қолди.
P.S. Оқ уйнинг аниқлик киритишига кўра, ушбу суҳбат шахсан Дональд Трамп билан эмас АҚШ президентининг махсус вакили Уиткофф ва Путин орасида бўлиб ўтган.