ТОШКЕНТ, 10 мар – Sputnik. Россия ҳарбийлари Курск вилоятини украиналик жангарилардан тозалаш учун қўлидан келган барча ишни қилмоқда. Бу ҳақда Россия президенти матбуот котиби Дмитрий Песков маълум қилди.
“Албатта, ҳарбийларимиз ерларимизни жангарилардан имкон қадар тезроқ тозалаш учун қўлдан келган барча ишни қилишмоқда. Биз бундай қилинишига шубҳа қилмаймиз”, - деди Кремль вакили.
Песков Россия жангчиларига муваффақият тилади.
Шунингдек, у Курск вилоятини озод қилиш учун бирор бир муддат белгиланмаганини таъкидлади.
Украина Қуролли кучлари 2024 йил 6 август куни Курск вилоятига ҳужум қилишди. Минтақа ҳудудида федерал хусусиятдаги фавқулодда ҳолат жорий қилинган. Чегара олдидаги аҳоли хавфсиз жойга кўчирилган.
Россия Мудофаа вазирлиги хабарига кўра, Киев Курск йўналишида жангавор ҳаракатлар бошлангандан буён 65 мингдан зиёд ҳарбийсини йўқотган. Россия армияси Курск вилоятида ҳозирги кунга қадар 32 та аҳоли пунктини озод қилишга эришди.
Биргина 8-9 март кунлари 7 та қишлоқ озод қилинди: Малая Локня, Черкасское Поречное, Косица, Лебедевка, Викторовка, Николаевка ва Старая Сорочина. Украина жангариларини йўқ қилиш операцияси давом эттирилмоқда.