ТОШКЕНТ, 4 март — Sputnik. АҚШ президенти Дональд Трамп Киев тинчлик музокаралари тарафдори деган қарорга келмагунча, Украинага барча ҳарбий ёрдам тўхтатилишини маълум қилди. Бу ҳақда Оқ уйнинг юқори мартабали вакилига таяниб, "Fox News" телеканали хабар берди, деб ёзмоқда РИА Новости.
“Президент Трамп украиналиклар адолатли тинчлик музокараларига содиқлигини намойиш этаётганини аниқламагунча Қўшма Штатлар АҚШнинг Украинага кўрсатаётган барча ҳарбий ёрдамини тўхтатмоқда”, — деди бошловчи Америка маъмуриятининг юқори мартабали вакилига таяниб.
Телеканалнинг аниқлик киритишича, гап ёрдамни бутунлай тўхтатиш ҳақида эмас, фақат вақтинчалик тўхтатиб туриш ҳақида кетмоқда.
РИА Новостининг Британиянинг "The Times" газетасига таяниб ёзишича, агар Зеленский Вашингтон билан келишувни имзолашни кечиктирса, у Украина Қуролли кучларининг жанг майдонидаги аҳволини ёмонлаштириши ва музокаралардаги позициясини янада заифлаштириши мумкин.
"Агар бундай вазият узоқ вақт давом этса, Украина жанг майдонида зарар кўриши мумкин, бу эса Россиянинг музокаралардаги мавқеини мустаҳкамлайди", — дейилади нашрда.
АҚШ вице-президенти Жеймс Дэвид Вэнснинг сўзларига кўра, Владимир Зеленский Украина бўйича тинчлик битими тафсилотларини муҳокама қилишдан бош тортар экан, Овал офисга қайтолмайди.
Вэнс таъкидлаганидек, Зеленский АҚШ президенти билан бўлган тортишуви орқали тинчлик жараёнида иштирок этишни истамаслигини яққол кўрсатди. Шу билан бирга, учрашувнинг биринчи ярим соати давомида Америка раҳбари Киев режими раҳбарининг ёлғонларига қарамай, меҳрибон ва хушмуомала бўлишга ҳаракат қилган.
Унинг қўшимча қилишича, европаликларнинг Киевни қўллаб-қувватлаётгани ҳақидаги очиқ баёнотлари уни ташвишлантирмайди, бироқ улар Зеленскийга можарога барҳам бериш зарурлигини шахсий тарзда етказишлари керак.
Вэнс Киев учун хавфсизлик кафолатлари ҳақида гапирар экан, энг яхши вариант "америкаликларга Украина келажагига иқтисодий нуқтаи назарни бериш" эканлигини айтди.
Алабамадан республикачи сенатори Томми Табервиллнинг фикрича, Владимир Зеленский Украина тақдирини ҳал қилишда ҳақиқий иштирок этмайди, бу Россия ва АҚШ томонидан амалга оширилади.
“Зеленский қаттиқ ўйнайди, лекин биласизми? У ҳатто ўйинда ҳам эмас. Улар (Россия президенти Владимир) Путин, президент (АҚШ Дональд) Трамп ва биз томонда бўлган одамлар охир-оқибат Украинанинг келажаги тўғрисида қарор қабул қилишади”, — деди сенатор.
Сиёсатчининг қўшимча қилишича, Зеленский ва Европа Иттифоқи Украина можароси шароитида Трамп билан "бир жамоада эмас" ва унинг давомини хоҳлашади.
Владимир Зеленский ва Дональд Трамп ўртасидаги шов-шувли учрашувдан сўнг Европа Иттифоқи ҳарбий харажатларни кескин ошириш масаласини кўриб чиқмоқда. Зеленский АҚШга ташрифидан сўнг дарҳол Буюк Британияга йўл олди. Бош вазир Кир Стармер уни дўстона кутиб олди. У Буюк Британия Украинани тўлиқ қўллаб-қувватлаши ва қанча вақт керак бўлса, Украина билан бўлишини айтди.
Украина масаласи бўйича Европа Иттифоқининг фавқулодда саммити 6 март куни ўтказилиши режалаштирилган. Европа Кенгаши президенти аллақачон ҳукуматлардан Киевни қўллаб-қувватлаш учун қандай ҳисса қўшишга тайёрлигини сўрамоқда.
Франция президенти Эммануэль Макроннинг хориж нашрига айтишича, 6 март куни “Европа Иттифоқи Украина учун юзлаб миллиард евро маблағ ажратилишини маъқуллайди”.