Шарқ санъати музейида тарих ва ижод уйғунлиги
Шарқ маданияти ва санъатининг уч буюк сиймоси – Aлишер Навоий, Заҳириддин Муҳаммад Бобур ва Камолиддин Беҳзод асрлар давомида жаҳон меросининг ажралмас қисми бўлиб келмоқда. Мазкур кўргазмада уларнинг ижоди Ўзбекистон рассом ва ҳайкалтарошларининг асарлари орқали талқин этилган.
Aлишер Навоий – маънавият ва илҳом тимсоли
Aлишер Навоий – буюк шоир, давлат арбоби ва маърифатпарвар бўлиб, у ўзбек адабий тилининг асосчиси, санъат ва фан ҳомийси сифатида тарихга муҳрланган. Унинг ижоди кўплаб рассомлар учун илҳом манбаи бўлиб хизмат қилган.
Кўргазмада Aлександр Визелнинг “Aлишер Навоий ҳаёти” линогравюраси, Қутлуғ Башаровнинг “Шукуҳли карвон” иллюстрациялари ҳамда Илҳом Жабборовнинг бронза ҳайкали эътиборни тортади. Шунингдек, Баҳодир Жалолов ва Aнвар Мамажоновнинг график ишлари Навоийнинг “Лайли ва Мажнун” ҳамда “Ҳайрат ул-аброр” каби асарлари мотивларида яратилган. Ёш миниатюрачи Саида Жалилованинг “Лисон ут-тайр” туркуми эса Навоийнинг фалсафий қарашларини тасвирий санъат тилида акс эттирган.
Бобур – шоир ва саркарда
Заҳириддин Муҳаммад Бобур – адабиёт ва тарихда чуқур из қолдирган шоир, олим ва саркарда. Унинг ижоди, хусусан, “Бобурнома” Шарқ адабиёти ва илм-фанининг ноёб намуналаридан бири ҳисобланади. Бобурнинг сиймоси рассомлар томонидан турли жанрларда талқин этилган бўлиб, Ниёзали Холматовнинг “Камолиддин Беҳзод” асари шоирнинг тарихий қиёфасини ўзида акс эттиради.
Беҳзод – миниатюра санъатининг бетакрор намоёндаси
Камолиддин Беҳзод – Шарқ миниатюрасининг буюк устаси бўлиб, у ўзининг нафис ва жонли тасвирлари билан санъат ихлосмандларини ҳайратга солиб келмоқда. Кўргазмада унинг Россия миллий кутубхонасида сақланаётган миниатюраларининг нусхалари ҳам намойиш этилмоқда. Шунингдек, Тўлаган Тожихўжаевнинг мармар ҳайкали Беҳзоднинг санъат оламидаги буюк ўрнини ёдга солади.
Санъат ва тарих уйғунлиги
Кўргазмада Ю.Стрелников, A.Сиглинсев, Л.Рябцев, М.Кагаров каби рассомларнинг график ишлари ҳамда A.Бойматовнинг ҳайкалтарошлик асари намойиш этилмоқда. Бундан ташқари, маҳорат дарслари ҳам ташкил этилиб, санъат ихлосмандларига график ва миниатюра санъати сир-асрорлари ўргатилади.
Навоий, Бобур ва Беҳзоднинг мероси асрлар оша ўз қадр-қимматини йўқотмайди. Камолиддин Беҳзод номидаги Шарқ миниатюра санъати музейи эса ушбу бой маданий меросни сақлаш ва тарғиб этишга хизмат қилмоқда.