TOШКЕНТ, 3 март — Sputnik. Леонардо да Винчининг энг буюк ихтироларидан баъзилари Беруний, Хоразмий, Фарғоний каби буюк ўзбек олимларининг асарларига асосланган. Бу ҳақда Леонардо да Винчи мероси бўйича таниқли мутахассис Марио Тедди маълум қилди, дея хабар берди Ислом цивилизацияси маркази матбуот хизмати.
Ислом цивилизацияси марказига ташриф буюрган олимнинг қайд этишича, Леонардо да Винчи ва Микеланжело каби Ғарб Ренессанси олимлари Марказий Осиё алломаларининг илмий меросидан фойдалангани, Ўзбекистонда етук ўзбек олимлари кашфиётларидан илҳомланган Леонардо да Винчига бағишланган кўргазма ташкил этиш режалаштирилган.
"Бунга ишонмаслигингиз мумкин, аммо Леонардонинг энг буюк ихтироларидан баъзилари Беруний, Хоразмий, Фарғоний каби буюк ўзбек олимларининг асарларига асосланган. Мисол учун, Берунийнинг китобларида кейинчалик Леонардо да Винчи томонидан амалга оширилган кўплаб ғояларни топиш мумкин. Кўриниб турибдики, да Винчи қадимги математика ва геометрияни ўрганган ва бу бежиз эмас! Зеро замонавий математика асослари айнан сизларнинг заминингизда дунёга келган. Бу халқингизнинг тарихий фахри ва биз бу кашфиётларни замонавий технологиялар ёрдамида жонлантириш ниятидамиз", — дея таъкидлади Тедди.
Айтилишича, Ўзбекистондаги Ислом цивилизацияси марказида Беруний, Хоразмий ва бошқа буюк алломаларнинг асарлари Уйғониш даврига қандай таъсир кўрсатганини намойиш этиш мақсадида "Ўзбекистон буюк алломалари ва Микеланжело" экспозицияси ташкил этилади.