TOШКЕНТ, 26 фев — Sputnik. Ўзбекистон ҳудудида фанга номаълум бўлган қўнғиз тури аниқланди, дея хабар берди мамлакат Фанлар академияси матбуот хизмати.
Хоразм Маъмун академияси таянч докторанти Бекчанов Норбек томонидан бир неча йиллик илмий изланишлари натижасида фанга номаълум бўлган иккита қўнғиз тури аниқланди.
Қўнғизлар ёки қаттиқ қанотлилар ҳашаротлар ичида энг йирик туркум бўлиб, ер юзининг деярли барча минтақаларида учрайди ва экотизимнинг энг муҳим жонзотларидан ҳисобланади.
“Улар орасида экинлар зараркунандаларидан тортиб то табиатга ва инсон ҳаётига фойда келтирадиганлари ҳам бор. Бундан ташқари, ноёб ва йўқолиб бораётган муҳофазага олинган турлари ҳалигача илм-фанга номаълум бўлганлари ҳам бор. Мана шундай фанга номаълум бўлганларидан иккитаси Ўзбекистон ҳудудидан аниқланди”, — дейилган хабарда.
Аниқланган янги турларга Microdera uzbekistanica ва Microdera abdullohi деб ном берилди.
“Бу турлар “Tenebrionidae” оиласига мансуб бўлиб M.uzbekistanica Кулжуктоғ ҳудудида (Бухоро ва Навоий вилоятлари) ва М.abdullohi тури эса Султон-Увайс тоғи ҳудудида (Қорақалпоғистон) тарқалган, асосан тунда фаоллашадиган бу турлар қуруқ муҳит учун жуда мослашган эндемиклардир”, — дея аниқлик киритилган хабарда.
Айтилишича, мазкур уруғ турлари бутун дунё бўйича 88 тани ташкил этган, бу кўрсаткич энди яна 2 тага кўпайди