ТОШКЕНТ, 16 фев — Sputnik. Евроосиё иқтисодий комиссияси (ЕИК) ва Жануби-Шарқий Осиё давлатлари ассоциацияси (АСЕАН) котибияти истеъмолчилар ҳуқуқларини ҳимоя қилиш бўйича биринчи қўшма семинарни ўтказади, дея хабар беради комиссия матбуот хизмати.
Ҳамкорлик истиқболлари ЕИКнинг Санитария, фитосанитария ва ветеринария чоралари департаменти директори Владимир Синкевич ва АСЕАН котибиятининг рақобат, истеъмолчилар ҳуқуқларини ҳимоя қилиш ва интеллектуал мулк бўлими раҳбари Тханг Ван Луонг ўртасида кўриб чиқилди.
“Ўзаро манфаатли ҳамкорлигимизни чуқурлаштириш истеъмолчилар ҳуқуқларини ҳимоя қилиш бўйича илғор тажриба алмашиш, ЕОИИ ва АСЕАН минтақаларида истеъмол бозорида қулай ва барқарор муҳит яратиш учун ноёб имкониятлар яратади”, — деди Синкевич.
Унга кўра, яхлит хўжалик бирлашмаларининг шаклланиши шароитида истеъмолчилар ҳуқуқларини ҳимоя қилиш масалалари биринчи ўринга чиқади.
“Учрашув якунлари бўйича биринчи қўшма семинарни ўтказиш бўйича келишувга эришилди, унинг мақсади ЕОИИ ва АСЕАН мамлакатларида истеъмолчилар ҳуқуқларини ҳимоя қилиш соҳасида тажриба ва билим алмашишдир”, — дейилади хабарда.
Айтилишича, мазкур тадбир шериклик алоқаларини ривожлантириш ва истеъмолчилар ҳуқуқлари, хавфсизлиги ва фаровонлигини таъминлаш бўйича биргаликдаги саъй-ҳаракатларни кучайтиришда муҳим қадам бўлади.