TOШКЕНТ, 13 фев — Sputnik. Россия президенти Владимир Путин ва АҚШ президенти Дональд Трамп ўртасида телефон орқали мулоқот бўлиб ўтди, дея хабар берди Кремль.
Қайд этилишича, 12 февраль куни Путин ва Трамп деярли бир ярим соат давомида суҳбатлашди. Етакчилар Россия ва АҚШ фуқароларини алмашиш, шунингдек, Украинадаги вазиятни тартибга солиш масалаларини муҳокама қилган. Президентлар бошқа мавзуларга ҳам тўхталиб ўтишди: Яқин Шарқдаги келишув, Эрон ядро дастури, иқтисодий соҳадаги икки томонлама Россия-Америка муносабатлари.
Россия президенти, шунингдек, Америка давлати раҳбарининг ҳамкорлик қилиш вақти келгани ҳақидаги асосий тезисларидан бирини қўллаб-қувватлади.
“Россия президенти АҚШ президентини Москвага ташриф буюришни таклиф қилди ва америкалик расмийларни Россияда томонларни қизиқтирган соҳалар, жумладан, Украина муаммоси бўйича қабул қилишга тайёрлигини билдирди”, — дейилади хабарда.
Шунингдек, Владимир Путин ва Дональд Трамп шахсий алоқаларни давом эттириш, жумладан, шахсий учрашувлар ташкил этишга келишиб олишди.
“Украинадаги келишув мавзуси ҳам муҳокама қилинди. Дональд Трамп жанговар ҳаракатларни тезроқ тугатиш ва муаммони тинч йўл билан ҳал этиш тарафдори эканини айтди. Владимир Путин, ўз навбатида, можаронинг асл сабабларини бартараф этиш зарурлигини эслатиб ўтди ва Дональд Трамп билан тинч музокаралар орқали узоқ муддатли келишувга эришиш мумкинлиги ҳақидаги фикрга қўшилди”, — дея қайд этилган хабарда.
АҚШ президенти ўзининг Truth Social ижтимоий тармоғида “биз Россия/Украина билан урушда миллионлаб ўлимларни тўхтатмоқчимиз”, деб ёзди.
Унинг қайд этишича, Россия президенти Владимир Путин билан узоқ ва самарали телефон суҳбати чоғида нафақат долзарб масалалар муҳокама қилинган, балки икки давлатнинг Иккинчи жаҳон уруши давридаги биргаликдаги кураш тарихи эсга олинган.
“Иккаламиз ҳам мамлакатларимизнинг буюк тарихи ва Иккинчи жаҳон урушида қандай қилиб биргаликда муваффақиятли курашганимиз ҳақида эсладик, Россия ўн миллионлаб одамларини йўқотганини, биз эса, ўз навбатида, жуда катта йўқотишларга учраганимизни эсладик”, — деб ёзди Трамп.
Унга кўра, етакчилар Украина, Яқин Шарқ, энергетика, сунъий интеллект, долларнинг таъсири ва бошқа мавзуларни ҳам муҳокама қилишган. Трамп Украинани қўллаб-қувватлашини, аммо АҚШ сарфлаган маблағлар бўйича мажбуриятларни олишни исташини айтди.
“Мен Украинани қўллаб-қувватлайман, лекин пулларимиз бўйича мажбуриятларни олишни истайман”, — деди Трамп Оқ уйда.
Трампнинг айтишича, уни Украинадаги можарога барҳам бериш ва одамларнинг қурбон бўлишини тўхтатишдан бошқа ҳеч нарса ташвишлантирмайди.
АҚШ президенти Владимир Зеленский иштирокисиз Россия билан тўғридан-тўғри мулоқот ўтказишда ҳеч қандай таҳдид кўрмаётганини айтди. Трамп, шунингдек, Украинада бир кун президентлик сайловлари ўтказилиши кераклигини қўшимча қилди.
Шунингдек, АҚШ етакчиси Россия етакчиси Владимир Путиннинг АҚШга ташриф буюришини ва Россияга жавоб ташрифини амалга оширишини кутаётганини айтди. Шу билан бирга, у журналистларга Украинага ташриф буюриш ҳақида ҳеч қандай ваъда бермаганини таъкидлади.