TOШКЕНТ, 4 фев — Sputnik. Ўзбекистон ва Малайзия ўртасида коррупцияга қарши курашиш бўйича ҳамкорликни кенгайтириш режалари белгилаб олинди. Бу ҳақда Коррупцияга қарши курашиш агентлиги ахборот хизмати маълум қилди.
Коррупцияга қарши курашиш агентлиги директори Акмал Бурхонов бошчилигидаги делегация Малайзиянинг Коррупцияга қарши курашиш комиссиясида бўлди.
Учрашувда Малайзиянинг коррупцияга қарши курашиш комиссияси бош комиссари Дато Сри Хожи Азам Бин Баки, шунингдек, Малайзия Коррупцияга қарши курашиш академияси раҳбари Сайфул Эзрал Орифин иштирок этди.
“Ўзбекистон Коррупцияга қарши курашиш агентлиги билан Малайзия Коррупцияга қарши курашиш комиссияси ўртасида 2025-2026 йилларга мўлжалланган Ҳаракатлар режаси имзоланди”, — дейилади хабарда.
Қайд этилишича, ҳужжат билан икки давлат аксилкоррупция идоралари ўртасида 2025-2026 йилларда соҳада тажриба алмашиш, илғор амалиётни ўрганиш ва жорий этиш юзасидан ҳамкорликнинг аниқ механизмларини акс эттиради.
“Томонлар ҳамкорликда йирик қўшма аксилкоррупция тадбирларини ташкил этиш, давлат хизматчиларини коррупцияга қарши ўқитишда Малайзия тажрибасини Ўзбекистонда татбиқ этиш, “ҳалоллик текшируви” лойиҳасини ишга тушириш ҳамда қўшма ўқув дастурлари ишлаб чиқишни режалаштирилмоқда”, — дея қайд этилган хабарда.
Шунингдек, ҳужжатда давлат органлари ва ташкилотларида коррупцияга қарши ички назорат механизмларини жорий этиш ва улар фаолиятида коррупциявий хавф-хатарларни камайтириш бўйича Малайзия ва Ўзбекистон амалиётини солиштирган ҳолда тажриба алмашиш назарда тутилган.
“Малайзия Агентлигимиз фаолият бошлаган дастлабки даврларданоқ биз учун яқин ва манфаатли ҳамкорлардан бири бўлиб келмоқда, - дейди Бурханов. — 2022 йилда мамлакатнинг Коррупцияга қарши курашиш комиссияси (МАСС) раҳбари Азам бин Бакининг Тошкентга амалга оширган ташрифи доирасида идораларимиз ўртасида ҳамкорлик меморандуми имзолангани нафақат икки томон фаолиятида, балки Ўзбекистон ва Малайзия ўртасида узоқ давом этадиган ҳамкорликнинг муҳим дебочаси бўлди”.
Агентства по борьбе с коррупцией Узбекистана и Малайзии подписали план действий на 2025-2026 годы
© Агентство по противодействию коррупции Республики Узбекистан
Азам бин Бакининг сўзларига кўра, ҳозирда дунё бўйлаб коррупцияга қарши курашишда кенг кўламли ишлар амалга оширилмоқда, мамлакатлар томонидан кўплаб чора-тадбирлар кўрилмоқда. Бу йўналишда тажриба алмашиш жуда муҳим.
“Коррупцияга қарши курашиш комиссияси ходимлари коррупцияга қарши кураш ва унинг олдини олиш, ҳамда ушбу йўналишдаги таълим дастурларини Ўзбекистоннинг Коррупцияга қарши куршиш агентлиги билан бўлишишга тайёр. Биз эса, ўз ўрнида,Ўзбекистоннинг коррупцияга қарши курашишдаги илғор тажрибаларини ўрганишга тайёрмиз, чунки кейинги йилларда мамлакатингизда ушбу йўналишда катта ислоҳотлар олиб борилаётганини кузатмоқдамиз, ва катта ютуқларга эришаётгангизни ҳам кўриб турибмиз”, дея таъкидлади Азам бин Баки.
Учрашувда ҳамкорликнинг қуйидаги янги йўналишлари муҳокама этилди:
коррупциянинг олдини олишнинг таъсирчан чоралари бўлган жамоатчилик назорати ва журналистик суриштирувларни ўтказиш бўйича қўшма амалий тадбирларни амалга ошириш;
Ўзбекистонда ишлаб чиқилаётган “Коррупцияга қарши курашиш бўйича 2030 йилгача мўлжалланган миллий стратегия” лойиҳасини Малайзия экспертларининг таклиф ва тавсиялари асосида такомиллаштириш;
ҳуқуқни муҳофаза қилувчи идоракар ходимлари учун коррупциявий ҳолатлар бўйича дастлабки суриштирув, тергов ва маълумотларни йиғиш, шунингдек, давлат харидлари жараёнларида коррупциявий хавфларни аниқлаш ва олдини олиш борасида тренинглар ташкил этиш.
Малайзия томони шу йил июль ойида Куала-Лумпурда бўлиб ўтадиган “Ҳалоллик ва корпоратив бошқарув” мавзусидаги халқаро анжуманга Ўзбекистон вакилларини таклиф қилди.