Галереяда 2000 дан ортиқ рангтасвир ва графика асарлари тўплами мавжуд бўлиб, бу тўплам Ўзбекистон тасвирий санъатининг барча ижодий мактаблари ва йўналишлари хилма-хиллигини акс эттиради. Ҳар бир ташриф буюрувчи ўзбек санъатининг бетакрор дунёсини кашф қилиши мумкин.
"Абстракт санъат – бу нафақат визуал завқланиш, балки шахсий мулоҳазалар майдонидир. Ҳар бир асар инсонни ўзи билан мулоқотга чорлайди", – дейди санъатшунос Саодат Рўзиева.
Замонавий санъат горизонтлари
Ҳозирги вақтда галереянинг экспозицияси ўзбек рассомларининг ғоялар эркинлиги ва маҳоратини акс эттирувчи абстракт санъат асарларини намойиш қилмоқда. Лариса Дабижа, Шарифа Шарафхўжаева, Нуриддин Расулов, Анна Санд, Инна Сандлер, Диёр Разиқов ва Флорида Гамбароваларнинг асарлари табиат ва ранглар бойлигини очиб беради. Ушбу асарлар томошабинни визуал талқинлар оламига чорлайди.
Лариса Дабижа: "Қизил саҳро"
Экспозициянинг марказий асари Лариса Дабижанинг "Қизил саҳро" картинаси бўлиб, у бой палитра ва шакллар динамикаси билан ҳайратга солади. Қизил осмон – олов рамзи, ҳамда юмшоқ кўк чизиқлар – сув тимсоли, бир-бири билан уйғунлашиб, чуқур маъноларни акс эттиради. Бу асарда табиатнинг уйғунлиги ва абадий қарама-қаршилигини ҳис қилиш мумкин.
Нуриддин Расулов: "Саҳар"
"Саҳар" асарида Нуриддин Расулов табиатнинг уйғониш дақиқасини маҳорат билан тасвирлайди. Олтин ва кўкимтир-яшил рангларнинг уйғунлиги енгиллик ва шаффофлик ҳиссини уйғотади. Асар текстураси табиат ҳаракатларини – майсаларнинг енгил тебраниши ва сув тўлқинларини эслатади, томошабинга табиат билан уйғунлик туйғусини тақдим этади.
Анна Санд: "Рефлексия"
Анна Санднинг "Рефлексия" асари орзулар ва мулоҳазалар муҳитини яратади. Юмшоқ қўнғир ва кулранг-сиёҳ ранглар оққора соялар билан уйғунлашиб, шафақ осмонини эслатади. Динамик мазоклар композицияга чуқурлик ва рамзийлик бағишлайди, уни умид ҳисси билан тўлдиради.
Ҳис-туйғулар оламига саёҳат
Галереянинг бугунги кундаги экспозициясидаги ҳар бир асар абстракт санъатнинг янги ўлчамини очади. Асарлар жумбоқли, бу ерда тайёр жавоблар йўқ, уларни ҳар бир томошабин ўзича талқин қилади ва ўзига саволлар билан мурожаат қилади.
Сизларни замонавий ўзбек санъатининг ўзига хослиги – нур, ранг ва маънолар мулоқоти билан танишиш учун галереяга ташриф буюришга таклиф этамиз.