ТОШКЕНТ, 21 дек — Sputnik. Ўзбекистон ва Кувайт ўртасида тўғридан-тўғри ҳаво қатновлари йўлга қўйилиши мумкин. Бу ҳақда “Дунё” АА хабар берди.
Ўзбекистон элчиси Аюбхон Юнусов Кувайт Фуқаро авиацияси бош бошқармаси раҳбари шайх Ҳамуд Муборак ал-Ҳамуд ал-Жобир ас-Сабоҳ билан учрашув ўтказди. Суҳбат чоғида Ўзбекистон ва Кувайт авиация ташкилотлари ўртасидаги ҳамкорликни жадаллаштириш, тўғридан-тўғри ҳаво қатновларини йўлга қўйиш ва бошқа масалалар муҳокама қилинди.
Шайх Ҳамуд Муборак ал-Ҳамуд жорий йилнинг 24 октябрь куни Малайзияда бўлиб ўтган ИКАО йиғилиши доирасида Ўзбекистон Фуқаро авиацияси делегацияси билан бўлган самарали учрашуви натижаларини эътироф этди. Унинг айтишича, "Kuwait Airlines" авиакомпаниясининг самолётлар паркини кенгайтириш мақсадида 2025 йилда "Ал-Кувайт-Тошкент" йўналиши бўйича авиарейсларни амалга ошириш режалаштирилмоқда.
Сўнгги йилларда виза режими соддалаштирилиши натижасида 90 дан ортиқ хорижий давлатлар, жумладан Кувайт фуқаролари учун Ўзбекистонга визасиз кириш тартиби амал қилаётгани ҳам "Kuwait Airlines" авиакомпанияси йўловчилари сонининг ортишига турки бўлиши қайд этилди.
Музокаралар натижасида, Кувайт Фуқаро авиацияси бош бошқармаси ва Ўзбекистоннинг тегишли идоралари ўртасида музокаралар ўтказиш тўғрисида келишиб олинди.