ТОШКЕНТ, 26 ноя — Sputnik. Россия АҚШнинг кетаётган маъмурияти Украинадаги вазиятни янада кескинлаштириш йўлидан боришда давом этаётганини хавотир билан қайд этади. Бу ҳақда Россия президенти матбуот котиби Дмитрий Песков маълум қилди, деб ёзмоқда РИА Новости.
Душанба куни Оқ уй координатори Жон Кирби биринчи марта Украина Американинг узоқ масофали ATACMS ракеталаридан Курск вилоятига ва "унинг яқинига" зарба бериш учун фойдаланишга рухсати борлигини тасдиқлади ва буни ўзини ҳимоя қилиш зарурати билан изоҳлади. Унинг қўшимча қилишича, Америка маъмурияти Украина қўшинлари томонидан “аниқ турдаги нишонларга” зарба бериш учун ATACMS ракеталаридан фойдаланиш имкониятлари бўйича йўриқномани ўзгартирган.
“Биз хавотир билан қайд этишда давом этамиз, кетаётган Вашингтон маъмурияти вазиятни янада кескинлаштириш йўлида давом этишни афзал кўрмоқда”, — деди Песков.
Россия президенти Владимир Путин аввалроқ мурожаат қилиб, Украина 19 ноябрь куни Американинг узоқ масофали ATACMS ракеталари ва Британиянинг узоқ масофали Storm Shadow ракеталаридан фойдаланган ҳолда Курск ва Брянск вилоятларидаги нишонларга ҳужум уюштирганини маълум қилган эди. Америка ва Британия қуролларининг қўлланилишига жавобан 21 ноябрь куни Россия Украина ҳарбий-саноат мажмуасига зарба берди.