ТОШКЕНТ, 20 ноя — Sputnik. Газ сарфи ва харажатларини онлайн режимда кузатиш имконини берувчи мобиль илова тест синовида ишга туширилди, дея хабар берди Энергетика вазирлиги.
Аввалроқ “Ҳудудий электр тармоқлари” АЖ томонидан янги “HET Billing Mobile” мобиль иловаси ишга туширилганди. Айтилишича, истеъмолчилардан “Табиий газ истеъмоли учун ҳам худди шундай мобиль илова ишлаб чиқиш бўйича таклифлар келиб тушган.
“Шу каби таклифлар инобатга олиниб, Энергетика вазирлиги ҳамда “Ҳудудгазтаъминот” АЖ томонидан аҳоли истеъмолчиларининг табиий газ сарфи ва харажатларини онлайн кузатиш имконини берувчи “Hudud Gaz Ta‘minot” мобиль иловаси тест синовида ишга туширилди”, — дейилади хабарда.
“Мазкур илова орқали истеъмолчилар бевосита кунлик ва ойлик кесимида табиий газ истеъмолини кузатиб бориш, хусусан, газ ҳисоб рақамларига тўлов қилиш ҳамда суюлтирилган газ истеъмолчилари ўз ҳисобларини тўлдириш ва бириктирилган баллонлар рўйхатини кўриб бориш имкониятига эга бўладилар”, — дея аниқлик киритилган хабарда.
Иловани юклаб олгандан кейин унга тегишли шахсий ҳисоб рақами ҳамда One ID хизмати орқали уланиш мумкин.