TOШКЕНТ, 16 окт — Sputnik. Миср ва Ўзбекистон муфтийлари фатволар ишлаб чиқишда ҳамкорлик қилади, дея хабар берди Ўзбекистон мусулмонлари идораси матбуот хизмати.
Ўзбекистон мусулмонлари идораси раиси, муфтий Шайх Нуриддин Холиқназар ва Миср Араб Республикаси муфтийси доктор Назир Муҳаммад Айёд фатво йўналишида ҳамкорлик қилиш масалаларини муҳокама қилишди.
“Миср ва Ўзбекистон муфтийлари фатволар ишлаб чиқишда ҳамкорлик қилади”, — дейилади хабарда.
Доктор Назир Муҳаммад Айёд ўзаро алоқалар узоқ ўтмишга бориб тақалишини қайд этиб, Ўзбекистон Миср учун муҳим аҳамиятга эга мамлакат эканини таъкидлади.
У Ўзбекистондаги ўзгаришларни доимо кузатиб бораётгани, Марказий Осиёда ягона бўлган Ўзбекистон мусулмонлари идораси ҳузуридаги Фатво маркази фаолияти катта аҳамиятга молик эканини таъкидлади.
“Келгусида ўзаро алоқаларни ривожлантириш ва диний соҳа ходимлари ўртасида малака ошириш курсларини ташкил этиш борасида ҳамкорлик қилишга тайёрлигини билдирди”, — дейилади хабарда.
Мулоқотда таълим, илмий-тадқиқот, малака ошириш ва диний-маърифий соҳалардаги ҳамкорликлар тобора ривожланиб бораётгани қайд этилди.