Тошкентда Ахборот-коммуникация технологиялари ҳафталиги бўлиб ўтмоқда. Унда робототехника, интернет тизимлари ва мобиль иловалар соҳасида фаолият юритувчи 200 тадан ортиқ хорижий ва маҳаллий ИТ-компаниялар иштирок этмоқда. Тадбир доирасида халқаро форумлар, саммитлар, танловлар ва конференциялар ҳам ўтказилади.
Мазкур тадбир Ўзбекистон-ахборот технологиялари соҳасида 2004 йилдан буён ҳар йили ўтказиб келинмоқда. У анъанавий равишда бир қатор ихтисослаштирилган тадбирларни ягона форматга бирлаштиради.
"Форумнинг асосий мақсади Ўзбекистонда рақамли ҳукуматни ривожлантиришдаги долзарб муаммо ва тўсиқларни аниқлаш, мавжуд имкониятлар ва истиқболли режаларни белгилаб олиш орқали фуқароларнинг давлат хизматларидан янада тезкор, қулай ва хавфсиз фойдаланишини таъминлаш, давлат хизматларини бунданда самарали, шаффоф ва ишончли тарзда тақдим этишга эришишдан иборат", — дея маълум қилди Рақамли технологиялар вазирлиги.
ICT Week Uzbekistan 2024 очилишида сўзга чиққан рақамли технологиялар вазири Шерзод Шерматов БМТнинг ҳар икки йилда ўтказиладиган электрон ҳукуматни ривожлантириш индексида Ўзбекистоннинг 6 поғонага юқорилаб, 63-ўринни эгаллагани ва индекснинг жуда баланд гуруҳига қўшилганини таъкидлади.
Ҳафталик 20 сентябргача давом этади. Унга соат 9:00 дан 18:00 га қадар ташриф буюриб, компаниялар томонидан ташкил этилган кўргазма ва стендлар билан яқиндан танишиш мумкин.
Батафси — Sputnik Ўзбекистон видеосида.