ТОШКЕНТ, 8 сен — Sputnik. Ўзбекистон президенти Шавкат Мирзиёев Бутунжаҳон кўчманчилар ўйинларининг очилишида иштирок этади, дея хабар берди давлат раҳбари матбуот хизмати.
Шавкат Мирзиёев Қозоғистон президенти Қасим-Жомарт Тоқаевнинг таклифига биноан 8 сентябрь куни амалий ташриф билан Остона шаҳрига жўнаб кетди.
"Қозоғистон пойтахтида давлатимиз раҳбари бешинчи Бутунжаҳон кўчманчилар ўйинлари – ЮНЕСКОнинг Номоддий маданий мерос рўйхатига киритилган этник спорт турлари бўйича халқаро спорт мусобақаларининг тантанали очилиш маросимида иштирок этади", — дейилади хабарда.
Ушбу спорт тадбирида дунёнинг 90 га яқин давлатидан 2 мингдан зиёд спортчи, жумладан, Ўзбекистон терма жамоаси иштирок этиши кутилмоқда.
Маълумот учун, бугун Бутунжаҳон кўчманчилар ўйинларининг очилиши бўлиб ўтади. Кенг кўламли турнир доирасида яккакурашларнинг миллий турлари, камондан отиш, анъанавий интеллектуал ва халқ ўйинлари, от спорти мусобақалари ўтказилади. Мусобақада 89 давлат иштирок этишини тасдиқлади ва 2,5 мингдан ортиқ спортчи келиши кутилмоқда. Бутунжаҳон кўчманчилар ўйинларининг умумий мукофот жамғармаси 253 миллион тенгени (526,4 минг доллар) ташкил этади. Миқдорлар ҳар бир тур учун индивидуалдир.