ТОШКЕНТ, 13 авг — Sputnik. Евроосиё иқтисодий иттифоқи (ЕОИИ) расмий халқаро спорт тадбирлари учун импорт қилинадиган товарларни ташиш тартибини соддалаштирди. Бу ҳақда Қозоғистон Савдо вазирлиги маълум қилди.
Қозоғистон Савдо вазирлиги маълумотларига кўра, эндиликда расмий халқаро спорт тадбирларини ташкил этиш ва ўтказиш учун мўлжалланган спорт анжомлари, жиҳозлари ва бошқа товарлар махсус божхона режимига жойлаштирилади. Бу хорижий товарларга ҳам, ЕОИИ мамлакатларида ишлаб чиқарилган ва учинчи мамлакатларга экспорт қилинадиган товарларга ҳам тегишли.
Ушбу чора-тадбирлар бюрократик тўсиқларни ва товарларни рўйхатга олиш, назорат қилиш ва сертификатлаш хусусиятларини камайтиради.
“Масалан, жамоа аъзоларининг шахсий истеъмоли учун мўлжалланган ҳайвонлардан олинган маҳсулотларни (маркаланган асл ўрамда ва оғирлиги 5 килограммдан ортиқ бўлмаган) олиб кириш учун рухсатнома ва ветеринария сертификати талаб этилмайди”, — дейилади хабарда.
Хўш, агар товарлар спорт мусобақалари ўтказиладиган мамлакатда олиб қўйилган ёки хатланган бўлса, у ҳолда махсус божхона тартиби тўхтатилади ва бундай товарларга ўша мамлакат қонунчилигига мувофиқ муомала қилинади.
Бундан ташқари, ЕОИИ қарорида соддалаштирилган тартиб қўлланилмайдиган товарларга аниқлик киритилади. Булар акциз тўланадиган товарлар, қурилиш ва пардозлаш материаллари, шунингдек импорт рухсатномалари талаб қилинадиган товарлардир. Асосийси, бу маъмурий тўсиқларни ва спорт тадбирлари ташкилотчилари ва иштирокчилари учун харажатларни камайтиради.