TOШКЕНТ, 3 август — Sputnik. Евроосиё иқтисодий комиссияси (ЕИК) Евроосиё иқтисодий иттифоқида (ЕОИИ) божхона қонунчилигини такомиллаштиришда давом этмоқда. Бу ҳақда ЕИК матбуот хизмати хабар берди.
31 июль куни ЕИКнинг божхона ҳамкорлиги бўйича вазири Элдар Алишеров раислигида божхона фаолиятини тартибга солиш бўйича маслаҳат қўмитасининг йиғилиши ўтказилди. Унда божхона фаолиятини тартибга солишнинг долзарб масалалари кўриб чиқилди.
ЕОИИ Божхона кодексининг айрим нормалари ва Комиссия қарорларининг ЕОИИ давлатлари томонидан бир хил ижро этилишига, шунингдек, божхона хизматларининг Иттифоқда божхона транзити бўйича умумий жараённи амалга оширишга тайёрлигига оид муҳим масалалар муҳокама қилинди.
Йиғилиш иштирокчилари Божхона кодексининг бир қатор нормалари ва Комиссия ҳужжатларини такомиллаштириш бўйича кейинги ишларни қўллаб-қувватладилар.
“Иттифоқ ҳудуди бўйлаб божхона транзитини соддалаштириш муҳокама қилинаётганининг бизнес учун аҳамиятини ортиқча баҳолаш қийин. Майдонимизда бу борада, жумладан, божхона органларининг ахборот ҳамкорлигини такомиллаштириш борасида изчил ишлар олиб борилмоқда. Биз ҳозирги глобал иқтисодий вазиятда ташқи иқтисодий фаолиятни амалга ошириш билан боғлиқ ҳар қандай чақириқларга тезда жавоб беришга тайёрмиз ва ҳар доим ўз бизнесимизни имкон қадар қўллаб-қувватлаймиз”, - деди Элдар Алишеров.