TOШКЕНТ, 18 июл — Sputnik. Ўзбекистон президентининг ёрдамчиси Саида Мирзиёева кеча, 17 июль куни, Қатарнинг Ўзбекистондаги элчиси Ҳасан Ҳамза Ҳошим билан учрашди. Бу ҳақда Мирзиёева Телеграм-каналида хабар берди.
“Мулоқот давомида мамлакатларимиз ўртасидаги ҳамкорликни янада кенгайтириш, жумладан, таълим ва маданият соҳаларида қўшма лойиҳаларни амалга ошириш истиқболларини муҳокама қилдик”, - деб ёзади Мирзиёева.
Таъкидланишича, мулоқотда, хусусан, афғонистонлик қизларни Термиз шаҳрида ўқитиш лойиҳаси, шунингдек, Ўзбекистон талабалари учун Қатарнинг етакчи университетларида таҳсил олиш бўйича грант ўринларини кўпайтириш масалаларига алоҳида эътибор қаратилди.