ТОШКЕНТ, 14 июл — Sputnik. Ўзбекистон ва Венгрия табиий офатларга қарши курашиш соҳасида ҳамкорлик қилади, дея хабар берди "Дунё" АА.
Ўзбекистон элчиси Ойбек Шахавдинов Венгрия Табиий офатларга қарши кураш миллий бошқармаси бош директори ўринбосари Кристиан Эрдели билан музокара ўтказди. Унда икки давлат ўртасида табиий офатларга қарши курашиш соҳасидаги ҳамкорликни йўлга қўйиш муҳокама қилинди.
Венгрия вакили Ўзбекистон томони билан фавқулодда вазиятларни бошқариш ва табиий офатлар оқибатларига қарши курашиш соҳасида ҳамкорликни йўлга қўйишдан манфаатдор эканлигини билдирди.
“Ўзбекистон Фавқулодда вазиятлар вазирлиги билан бу борада тажриба алмашиш, ўзаро ташрифлар ташкил этиш, шунингдек, аниқ тадбирларни ўтказиш бўйича ҳамкорлик шартномасини имзолаш бўйича яқин алоқалар ўрнатиш бўйича келишувга эришилди”, — дейилади хабарда.
Қайд этилишича, мазкур келишувлар мамлакатлар ўртасида табиий офатлар ва фавқулодда вазиятларга қарши курашиш соҳасида шериклик алоқаларини кенгайтириш учун янги имкониятлар очади.