ТОШКЕНТ, 15 июн — Sputnik. Россия президенти Владимир Путин Украина можаросини ҳал қилиш бўйича аниқ қадамлар таклиф қилди, деди Die Weltwoche бош муҳаррири Рожер Кеппель YouTube'даги каналида.
“Бу президент Путиндан Украина томони рад этган мутлақо аниқ таклифдир”, - деди у.
Кеппель, шунингдек, G7 давлатларининг блокланган Россия активларидан Украинага 50 миллиард доллар ажратиш ҳақидаги қарорини “ўғрилик” деб атади. У бу ташаббусга шубҳа билан қарашини қўшимча қилди. Унинг фикрича, бу чора янада жиддий қарама-қаршиликка олиб келади.
Владимир Путин жума куни Россия Ташқи ишлар вазирлиги раҳбарияти билан учрашувда музокараларни бошлаш учун Украина ўз қўшинларини Россиянинг барча янги ҳудудлари – ДХР, ЛХР, Херсон ва Запорожье вилоятларидан олиб чиқиб кетиши кераклигини айтди. Россия давлати раҳбари Киев бу шартга рози бўлганидан сўнг, ҳарбий ҳаракатлар дарҳол тўхтатилишини таъкидлади. Шунингдек, Путиннинг сўзларига кўра, Киев НАТОга аъзо бўлиш режаларидан воз кечгани ҳақида расман маълум қилиши керак.