ТОШКЕНТ, 10 июн — Sputnik. ЕОИИ Евроосиё иқтисодий интеграциясининг янги босқичи остонасида турибди. Бу ҳақда Евроосиё иқтисодий комиссияси ҳайъати раиси Бахитжан Сагинтаев маълум қилди.
“ЕОИИ ялпи ички маҳсулотининг ўсиши 14 фоиздан ошди. Ўзаро товар айирбошлаш ҳажми икки баравар кўпайиб, қарийб 90 миллиард долларни ташкил этди. Асосий капиталга киритилган инвестициялар 43 фоизга ўсди ва 457 миллиард долларни ташкил этди”, — деди Сагинтаев.
Унинг таъкидлашича, бугунги кунда интеграция бирлашмасига аъзо мамлакатлар иқтисодий интеграциянинг янги босқичи остонасида турибди.
“Ўрта муддатли истиқболда давлатларимиз ЕОИИ бозорини асосий товарлар ва ресурслар билан таъминлаши, ишлаб чиқариш ва технологик занжирларни, янги даражадаги транспорт-логистика маконини, молия бозорини шакллантириш, шунингдек рақамли трансформация жараёнларини кучайтириш керак”, – дейди Бахитжан Сагинтаев.
Шунингдек, Евроосиё “бешлиги”нинг халқаро фаолиятига алоҳида эътибор қаратилиб, ЕОИИ иқтисодий жозиба қутбига айланиши кераклигини таъкидлади.
Бахитжан Сагинтаевнинг айтишича, келаси йили давлат раҳбарлари номидан “Евроосиё иқтисодий йўли” декларациясини амалга ошириш бўйича йўл харитаси тайёрланади. Ушбу ҳужжат Иттифоқда 2030 йилгача ва 2045 йилгача бўлган даврда иқтисодий жараёнларни ривожлантириш векторини белгилайди.