ТОШКЕНТ, 6 июн — Sputnik. Ўзбекистон, Беларусь, Қирғизистон ва Россия Евроосиё иқтисодий иттифоқи (ЕОИИ) мамлакатлари биржалари ўртасида шартнома имзолади. Ҳужжат Санкт-Петербург халқаро иқтисодий форуми доирасида имзоланди. Бу ҳақда Россия Иқтисодий ривожланиш вазирлиги раҳбари ўринбосари Дмитрий Вольвач маълум қилди.
Биржа савдосини ривожлантириш концепцияси 2024 йилнинг кузида ЕОИИ мамлакатлари раҳбарлари томонидан имзоланади.
Бундан ташқари, вазир ўринбосари Беларусь, Ўзбекистон, Қирғизистон ва Россия биржалари вакиллари товар бозори кўрсаткичларининг халқаро тизимини яратиш бўйича келишиб олганини маълум қилди.
“Бугун ҳамкасблар товар бозори кўрсаткичларининг халқаро биржа тизимини яратишга келишиб олдилар. Биржа савдоси ва мустақил нарх кўрсаткичлари тўсиқсиз савдони англатади, логистика вақтини ва босқичларини қисқартиради. Бундай механизмлар контрагентларга бир-бирларини топиш, нархларни трансляция қилиш ва ресурсларни тезда қайта тақсимлаш имконини беради”, — деди у.
Ўзбекистон Республика товар-хом ашё биржаси раиси ўринбосари Набихон Саматов “ушбу шартноманинг имзоланиши мамлакатларимиз иқтисодиётини жадал ривожлантиришга хизмат қилишига, ўзаро муносабатлар ва ташқи савдо ривожида катта туртки бўлишига ишонамиз”, деб айтди.