ТОШКЕНТ, 13 май — Sputnik. Ўзбекистон ва Осиё тараққиёт банки ()ОТБ ўртасида 3,5 млрд долларга тенг меморандум имзоланди. Бу ҳақда Инвестициялар, саноат ва савдо вазирлиги хабар берди.
Тбилисида ОТБ Бошқарувчилар кенгашининг 57-йиллик йиғилиши бўлиб ўтди. “Келажак сари кўприк” умумий шиори остида ўтказилган тадбирда Ўзбекистон бош вазирининг ўринбосари Жамшид Ходжаев бошчилигидаги Ўзбекистон делегацияси иштирок этди.
“Тадбир доирасида инвестициялар, саноат ва савдо вазири ўринбосари Хуррам Тешабаев ва ОТБнинг Марказий ва Ғарбий Осиё бўйича бош директори Евгений Жуков умумий қиймати 3,5 миллиард долларлик 2025-2027 йилларга мўлжалланган дастурни амалга ошириш бўйича меморандумни имзоладилар”, — дейилади хабарда.
Айтилишича, дастурда ҳар икки томон учун ҳам манфаатли бўлган ва “Ўзбекистон – 2030” Стратегиясида белгиланган вазифаларга мувофиқ бўлган лойиҳалар ўрин олган.
Маълумот учун, Ўзбекистон 1995 йилда ОТБга аъзо бўлди. 1998 йилда ОТБнинг Ўзбекистондаги ваколатхонаси очилди. ОТБ томонидан Ўзбекистон суверен портфелига тақдим этган маблағларнинг умумий ҳажми 12 миллиард долларга етди. Ўтган йили ОТБ 4 та суверен лойиҳа ва 2 та дастурга 6 та кредит ва 1 та грант ажратди.