ТОШКЕНТ, 2 май — Sputnik. Евроосиё иқтисодий иттифоқи (ЕОИИ) давлатлари биргаликда иқтисодиётнинг батафсил таҳлилини тузишни бошлашади. Бу ҳақда Арманистон молия вазири ўринбосари Эдуард Акопян Еревандаги Россия-Арманистон давлат университетида бўлиб ўтган “ЕОИИда молиявий интеграцияни чуқурлаштириш” конференциясида маълум қилди, деб ёзмоқда Sputnik Арманистон.
Унинг таъкидлашича, Иттифоқнинг бешта давлати молия вазирликлари макроиқтисодий барқарорликнинг қўшма мезонлари бўйича келишиб олган.
Бу ерда халқаро амалиётдаги каби тахминан бир хил асосий мезонлардан фойдаланилади: давлат қарзининг ЯИМга нисбатан рисксиз даражаси 50%, бюджет тақчиллиги ЯИМга нисбатан 3% деб ҳисобланади. Агар бу кўрсаткичлар ошиб кетган бўлса, ҳукумат жорий харажатларни қисқартириш ва капитал харажатларни ошириш чораларини кўради.
Бу келажакдаги иқтисодий ривожланиш учун асос яратиш учун амалга оширилади. Бундан ташқари, Акопяннинг сўзларига кўра, Иттифоқ мамлакатларининг молия бўлимлари биргаликда батафсилроқ жадвалларни тузишни бошлашади, уларда улар иқтисодиётдаги маҳсулот ва хизматларни бюджет харажатлари билан таққослашади (input-output моделлари).
“Буларнинг барчаси иқтисодиёт ҳақида батафсилроқ маълумот беради ва бюджетлар, иқтисодиётни рағбатлантириш лойиҳалари ва ҳоказоларни тузишда аниқроқ қарорлар қабул қилишга ёрдам беради”, — дейилади хабарда.
Эслатиб ўтамиз, ЕОИИ 2015 йил 1 январдан фаолият юритаётган халқаро интеграция иқтисодий бирлашмасидир. Иттифоқнинг аъзолари - Россия, Арманистон, Беларусь, Қозоғистон ва Қирғизистон. Ўзбекистон кузатувчи давлат мақомига эга.