ТОШКEНТ, 13 апр – Sputnik. 12 апрель куни Евроосиё иқтисодий комиссияси (ЕИК) кенгаши Евроосиё иқтисодий иттифоқи доирасида Дори воситаларининг биоэквивалентлик тадқиқотларини ўтказиш қоидаларига ўзгартиришлар киритди. Бу ҳақда ЕИК сайтида хабар берилди.
Ўзгаришлар иккита процедурага тааллуқлидир: дори воситаларининг биоэквивалентлигини ўрганишда референт препарат танлаш ва одамларда биоэквивалентлик тадқиқотларини намунавий лаборатория тадқиқотлари билан алмаштириш тартиби.
Референт дори воситаларини танлаш тартиби қўшимча муқобил вариантларни танлаш имкониятини тақдим этади. Валентин Татарицкийнинг EИК Кенгаши аъзоларига тушунтиришича, "ўзгариш Иттифоқнинг божхона ҳудудига референт дори сифатида танланган асл дори воситаларини етказиб беришда юзага келадиган қийинчиликлар билан боғлиқ".
Ушбу вариантлар учинчи мамлакатларда дори воситаларини сотиб олишни осонлаштиради, шунингдек, нусха кўчирилган дори воситаларидан референт дори сифатида кенгроқ фойдаланиш имконини беради.
Ўзгаришлар Европа минтақаси, Америка ва Осиё мамлакатларида қўлланиладиган ўхшаш қоидаларга, шунингдек, Жаҳон соғлиқни сақлаш ташкилотининг умумий дори воситаларини муомалага киритишга йўл қўядиган ёндашувларига мос келади.