ТОШКЕНТ, 4 апр — Sputnik. Қозоғистоннинг Ақтобе вилоятида содир бўлган йўл-транспорт ҳодисасида 8 нафар Ўзбекистон фуқароси ҳалок бўлди. Бу ҳақда Ўзбекистон Фавқулодда вазиятлар вазирлиги ахборот хизмати маълумот берди.
Кеча, 3 апрель куни соат 17:00 ларда “Самара-Чимкент” автомобиль йўлида “Toyota-Alphard” русумли автомобиль ҳамда “Volvo” русумли юк автомобили иштирокида йўл-транспорт ҳодисаси содир бўлган. Ҳодиса оқибатида “Toyota-Alphard” русумли автомобилда бўлган жами 8 нафар Ўзбекистон фуқароси олган тан жароҳатлари туфайли воқеа жойида вафот этган.
Хабарга кўра, президент Шавкат Мирзиёевнинг топшириғига асосан бахтсиз ҳодисада вафот этганларни Мудофаа вазирлигининг махсус ҳаво борти орқали ватанга олиб келиш ва дафн этиш маросимларини ўтказиш бўйича Ҳукумат комиссияси тузилди. Шунингдек, барча зарур чора-тадбирлар кўрилмоқда.
Ўзбекистон Фавқудодда вазиятлар вазирлиги масъуллари Қозоғистонлик ҳамкасблари билан доимий алоқада бўлиб, бахтсиз ҳодисани келиб чиқиш сабабларини ўрганиш бўйича ҳамкорлик ишларини олиб бормоқда.
Шунингдек, Ўзбекистоннинг Ақтау шаҳридаги Бош консулхонаси Қозоғистоннинг тегишли ташкилотлари билан ҳамкорликда ишламоқда. Ҳолат алоҳида назоратга олинган.
Қўшимча маълумотлар бўйича Ўзбекистоннинг Ақтау шаҳридаги Бош консулхонасига қуйидаги рақам бўйича мурожаат қилиш мумкин: +7 (729) 277-71-17.