ТОШКЕНТ, 3 апр — Sputnik. МДҲга аъзо давлатлар Халқаро иқтисодий форуми доирасида “МДҲ ва ЕОИИ мамлакатларида ташқи савдо, божхона бошқаруви механизмларини такомиллаштириш” сессияси бўлиб ўтди. Бу ҳақда Евроосиё иқтисодий комиссияси (ЕИК) сайтида хабар берилди.
Унда ЕИКнинг Божхона қонунчилиги ва қўллаш амалиёти департаменти директори Сергей Владимиров Евроосиё иқтисодий иттифоқида божхона фаолиятини тартибга солишни ривожлантириш истиқболлари тўғрисида маъруза қилди.
Сергей Владимиров секция иштирокчиларига 2025 йил Стратегиясини амалга ошириш бўйича комиссиянинг электрон тижорат масалалари, ягона божхона транзити тизимини ривожлантириш, шу жумладан навигация пломбаларидан фойдаланиш бўйича маълумот берди. У айрим тоифадаги товарларни божхона чегараси орқали олиб ўтишни соддалаштиришга қаратилган ЕОИИ Божхона кодексига ўзгартиришлар киритиш билан боғлиқ ишларга батафсил тўхталиб ўтди, шунингдек, ваколатли иқтисодий операторлар институтини ривожлантириш режалари билан ўртоқлашди.
ЕИК божхона департаменти раҳбари 2030 йил декларациясини амалга ошириш доирасида божхона фаолиятини тартибга солишни янада такомиллаштириш истиқболларига тўхталди.
Сергей Владимиров ЕОИИнинг Божхона кодексига айрим тоифадаги товарларни Иттифоқнинг божхона чегараси орқали олиб ўтишни соддалаштиришга қаратилган бир қатор муҳим ўзгартиришлар ва “ташиш”га оид бир қатор нормаларни такомиллаштириш тўғрисида маълумот берди. Сергей Владимиров ушбу тузатишларнинг амалга оширилиши транзит юк ташиш ҳажмини ошириш, етказиб бериш хавфсизлиги даражасини ошириш ва савдо тўсиқларини камайтиришга ёрдам беришини таъкидлади.