ТОШКЕНТ, 30 мар — Sputnik. Евроосиё иқтисодий комиссияси энергетика ва инфратузилма вазири Арзибек Кожошев раислигида Евроосиё иқтисодий иттифоқига аъзо давлатларнинг энергетика соҳасидаги ваколатли органлари раҳбарлари кенгашининг йиғилиши ўтказилди. Бу ҳақда ЕИК сайтида хабар берилди.
Йиғилишда ЕОИИ умумий энергия бозорларини яратишнинг долзарб масалалари, шунингдек, ЕОИИнинг энергия хавфсизлигини таъминлашнинг асосий тамойиллари ва йўналишлари кўриб чиқилди.
Томонлар Иттифоқнинг газ, нефть ва нефть маҳсулотларининг умумий бозорларини шакллантириш бўйича халқаро шартномаларни тайёрлашнинг айрим жиҳатлари ва тараққиётини муҳокама қилдилар.
“Биз яқин келажакда Иттифоқ органлари даражасида келишилмаган масалаларни мазмунли муҳокама қилишни давом эттириш ниятидамиз”, - деди ЕИК вазири.
Энергетика вазирлари, шунингдек, умумий энергия бозорлари фаолиятининг нозик масалалари бўйича ўзаро мақбул ечимларга эришишга эътибор қаратишларини тасдиқладилар.
Шунингдек, учрашув чоғида томонлар аъзо давлатлар ва умуман ЕОИИнинг энергетик хавфсизлигини таъминлаш бўйича кўрилаётган чора-тадбирларнинг етарлилигини эътироф этиб, энергетика хавфсизлигини мустаҳкамлаш бўйича ҳамкорликни ривожлантиришни давом эттириш ниятини билдирдилар.
“ЕОИИга аъзо давлатлар қатор позицияларда бирдамлик намойиш этмоқда. Умумий энергия ресурслари бозорларини яратиш ва энергетика хавфсизлигини таъминлаш ЕОИИ давлатларининг умумий ва муҳим вазифасидир”, — деди Арзибек Кожошев.