ТОШКЕНТ, 27 янв — Sputnik. Sputnik Ўзбекистон матбуот марказида Евроосиё иқтисодий комиссияси фаолиятининг ҳисобот даври якунларига бағишланган “Москва-Минск-Бишкек-Ереван-Остона-Тошкент” видеоконференцияси бўлиб ўтди.
Комиссиянинг 2020-2023 йиллардаги фаолияти якунларини сарҳисоб қилар экан, ЕИК расмий вакили Ия Малкина Ўзбекистон ЕОИИда жуда фаол кузатувчи эканлигини таъкидлади.
Унинг сўзларига кўра, ЕИК ва Ўзбекистон ўртасидаги яқин ҳамкорлик аниқ натижаларга олиб келади, бу биринчи навбатда савдо-иқтисодий ҳамкорлик динамикасига ижобий таъсир кўрсатади.
“Ўзбекистон Евроосиё иқтисодий иттифоқининг савдо ҳамкорлари орасида ЕОИИга кирмаган барча МДҲ давлатлари орасида биринчи ўринда туради”, – деди Малкина.
Унинг қўшимча қилишича, Иттифоқ ташкил топганидан буён Ўзбекистон билан товар айирбошлаш ҳажми уч баробарга ошган.
Бундан ташқари, Малкинанинг таъкидлашича, республика ЕОИИнинг меваларга бўлган эҳтиёжининг деярли ярмини қоплайди. Озиқ-овқатга бўлган талабни қондириш нуқтаи назаридан иттифоқ 93% ўзини ўзи таъминлайди. Қолган 7 фоизи мева бўлиб, унга бўлган талабнинг деярли ярми Ўзбекистон томонидан қопланади.
Ўзбекистон ва ЕИК ҳамкорлик қиладиган соҳалар бўйича, Малкина республика билан савдо сиёсати, техник жиҳатдан тартибга солиш, саноат кооперацияси соҳаларида иш олиб борилаётганини таъкидлади.
“Молия сиёсати ва миграция соҳасидаги ҳамкорликни чуқурлаштириш режалаштирилган. Янги йўналишлар - фан, туризм, соғлиқни сақлаш кўриб чиқилмоқда. Шунингдек, инвестиция ва транспорт-логистика соҳаларида қўшма чора-тадбирларни амалга ошириш бўйича фаол ишлар олиб борилмоқда”, - дея қўшимча қилди у.
Малкина, шунингдек, Ўзбекистонни иттифоқ доирасида амалга оширилаётган лойиҳа фаолиятига улаш масаласи кўриб чиқилаётганини ҳам таъкидлади.
“Хусусан, гап иқлим кун тартиби, юк темир йўл транспорти, Евроосиё агроэкспресс лойиҳалари ва иттифоқнинг саноатлаштириш харитасини амалга оширишда ЕОИИ лойиҳаларида иштирок этиш ҳақида бормоқда”, — дея қўшимча қилди у.
Ўз навбатида, ЕИК Техник жиҳатдан тартибга солиш бўйича вазири Виктор Назаренко Ўзбекистонда 15 та техник регламент ЕОИИ талабларига мувофиқлаштирилганини таъкидлади.
“Умид қиламизки, Ўзбекистон Евроосиё иқтисодий иттифоқи билан савдодаги техник тўсиқларни бартараф этиш бўйича келишув имзолаган биринчи давлат бўлади”, - деди Назаренко.
У, шунингдек, ҳозирда ЕОИИ учун асосий вазифа янги ҳужжатларни ишлаб чиқиш эмас, балки қабул қилинганларини амалга ошириш эканлигини таъкидлади.