ТОШКЕНТ, 16 янв — Sputnik. Ўзбекистон ва Россия дори воситалари учун GMP сертификатларини ўзаро тан олиш устида ишламоқда. Бу ҳақда АОКАда ўтказилган брифингда Фармацевтика тармоғини ривожлантириш агентлиги ахборот хизмати раҳбари Севара Тўлаганова маълум қилди.
Қайд этилишича, Ўзбекистон ҳамда Россия ваколатли органлари томонидан тақдим этилган GMP сертификатларини ўзаро тан олинишини йўлга қўйиш борасида бир қатор ишлар амалга оширилмоқда.
“Фармацевтика тармоғини ривожлантириш агентлиги ҳамда Россия Федерацияси Саноат ва савдо вазирлиги Фармацевтика ва тиббиёт саноатини ривожлантириш департаменти ўртасида “Россия Федерацияси ва Ўзбекистон Республикасида зарур ишлаб чиқариш амалиёти соҳасидаги норматив-ҳуқуқий тартибга солишни баҳолаш ва уйғунлаштириш бўйича” йўл харитаси тузилди ва ушбу масалада фаолият олиб борувчи ишчи гуруҳ ташкил этилди”, — деди Севара Тўлаганова.
Бунда маҳаллий ишлаб чиқарувчилар томонидан ишлаб чиқарилган дори воситаларини Россияда Давлат рўйхатидан ўтказиш жараёнини енгиллаштириш ва бу орқали экспорт ҳажмини ошириш мақсад қилинган.
Қўшимча қилинишича, Россия GMP йўналишидаги инспекторларини фармацевтик инспекция ўтказишдаги ёндашувларини баҳолаш мақсадида ўтган йилнинг ноябрь ойида Ўзбекистондаги "RADIKS" МЧЖ ишлаб чиқариш корхонасида ҳамкорликда фармацевтик инспекция ўтказилди.
Шунингдек, Москва вилоятида жойлашган, инсулин дори воситасини ишлаб чиқариш бўйича энг йирик корхоналар қаторида бўлган "Герофарм" корхонасида Марказ ходимлари томонидан ишчи гуруҳ қўшма инспекция бўлиб ўтди.
Агентлигнинг Зарур амалиётлар марказига 2023 йил давомида фармацевтик инспекциялар ўтказиш юзасидан жами 752 та ариза келиб тушган. Улар асосида 19 та маҳаллий корхона ва 35 та хорижий корхонада GMP юзасидан, 153 та маҳаллий дистрибюторда GDP юзасидан ҳамда 1 та ҳусусий божхона омборҳонасида GSP юзасидан ва 4 та дорихонада GPP фармацевтик инспекция ўтказилган.
Маълумот учун, GMP (good manufacturing practice) — дори воситалари ишлаб чиқаришни ташкил этиш ва сифатини назорат қилиш талабларини белгилайдиган амалиёт.