ТОШКЕНТ, 9 янв — Sputnik. Бу йил рекорд даражадаги энг иссиқ йил бўлиши мумкин. Бу ҳақда РИА Новости "Bloomberg" нашрига таяниб хабар берди.
“Биринчи навбатда, албатта, иқлим ўзгариши айбдор. Қазиб олинадиган ёқилғиларнинг ёниши атмосферада иссиқхона газлари миқдорини оширади, бу эса ўртача глобал ҳароратнинг ошишига олиб келади”, — деб тушунтирилади хабарда.
Бироқ, нашрнинг таъкидлашича, содир бўлаётган воқеаларнинг яна бир муҳим сабаби Эль-Ниньо феномени — Тинч океанининг экваториал қисмидаги сув юзаси қатлами ҳароратининг ўзгариши билан боғлиқ исиш.
Шундай қилиб, сўнгги бир неча ўн йилликлар давомида иқлим ўзгариши ва Эль-Ниньо ёз ойларининг рекорд даражада иссиқ бўлишига олиб келди, дейилади мақолада.
Метеоролог Петтери Тааласнинг сўзларига кўра, 2024 йил янада иссиқроқ бўлади ва қурғоқчилик ёки тошқинлар тез-тез учрайди.
Шундай қилиб, ўтган йили Марказий Америкадаги қуруқ об-ҳаво Панама каналини озиқлантирадиган Гатун кўлининг қуриб кетишига олиб келди. Ўтган йилги юқори ҳарорат денгиз музларининг катта қисмини эриб кетишига сабаб бўлди, бу эса Шимолий Атлантика бўйлаб реактив оқимнинг ўзгаришига олиб келиши мумкин, деди Нидерландия Қироллик метеорология институти иқлимшуноси Викки Томпсон.
Натижада Европадаги бўронлар кучайиши ёки янги жойларда пайдо бўлиши мумкин, дея қўшимча қилди у. Инсоният иқлим тизимида маълум бир бурилиш нуқтасини босиб ўтди, деб хулоса қилади Bloomberg.
Аввалроқ хитойлик мутахассислар Шимолий яримшарда қиш фавқулодда илиқ бўлишини башорат қилган эди. Айрим жойларда ҳаво ҳарорати меъёрдан икки баравар юқори бўлади.