ТОШКЕНТ, 27 дек — Sputnik. Исроил Мисрнинг Ғазо секторидаги урушни тўхтатиш ва можародан кейинги келишув бўйича таклифининг биринчи босқичи бўйича муҳокамаларни бошлашга тайёр. Бу ҳақда "Ликуд" ҳукмрон партиясидан Кнессет депутати Дани Данон маълум қилди, деб ёзмоқда РИА Новости.
Аввалроқ "Asharq" телеканали Миср Исроил ва Фаластиннинг ҲАМАС ҳаракатига Ғазо секторидаги урушни тугатиш ва можародан кейинги ривожланиш бўйича уч босқичдан иборат таклифини тақдим этгани ҳақида хабар берган эди.
Биринчи босқич икки ҳафталик гуманитар сулҳни ўз ичига олади, уни яна икки ҳафтага узайтириш мумкин. Биринчи босқичда ҲАМАС 40 нафар исроиллик асир аёллар, болалар ва қарияларни озод қилиши керак.
Бунга жавобан Исроил худди шу тоифадаги 120 нафар фаластинлик маҳбусни озод қилиши кутилмоқда, сулҳ Ғазо секторига озиқ-овқат, тиббий ёрдам ва ёқилғи етказиб беришни ҳам назарда тутади.
"Биринчи босқич - биз мулоқот ёки музокараларни бошламоқчи бўлган нарса", — деди Данон "Wall Street Journal" газетасига.
Унинг сўзларига кўра, Исроил ҳукумати Мисрнинг режасини кўриб чиқмоқда, чунки у Ғазо секторида сақланаётган маҳбусларни озод қилиш имкониятига жиддий ёндашади. Шу билан бирга, депутат ҲАМАС вакилларини анклавнинг келажакдаги бошқарув тузилмасига киритиш ғоясини рад этди.
“Биз ҲАМАСнинг Ғазодаги келажакдаги келишувнинг бир қисми бўлмаслигини таъминлаш ниятидамиз”, — деди Данон.