ТОШКЕНТ, 13 ноя — Sputnik. Самарқандда БМТнинг Чўлланишга қарши кураш тўғрисидаги конвенцияси (CRIC-21) ижросини кўриб чиқиш қўмитасининг 21-сессияси иш бошлади. Бу ҳақида Sputnik мухбири маълум қилди.
Тадбирнинг очилиш маросимида Ўзбекистон президенти Шавкат Мирзиёевнинг табрик сўзи ўқиб эшиттирилди.
Самарқандда БМТнинг Чўлланишга қарши кураш тўғрисидаги конвенцияси (CRIC-21) ижросини кўриб чиқиш қўмитасининг 21-сессияси иш бошлади.
© Элина Бекназарова
“Ўзбекистоннинг жорий сессия якунларига кўра қум ва чанг бўронлари бўйича Самарқанд декларациясини қабул қилиш ташаббуси халқаро экспертлар ҳамжамияти томонидан қўллаб-қувватланишига ишонаман”, - дейилган табрик матнида.
Ўз навбатида, сессия раиси Биляна Калибарда ернинг деградацияси оқибатларини юмшатиш ва инсониятни озиқ-овқат, сув, уй-жой ва иқтисодий имкониятлар билан таъминлаш учун ерни муҳофаза қилишга қаратилган кун тартиби мамлакатларнинг тўлиқ иштироки ва фаол ишини талаб қилишини таъкидлади.
“Бу ерда бошлаган ишимиз иштирокчи мамлакатларда давом этиши кераклигини унутмаслигимиз керак”, — деди Калибарда.
Самарқандда БМТнинг Чўлланишга қарши кураш тўғрисидаги конвенцияси (CRIC-21) ижросини кўриб чиқиш қўмитасининг 21-сессияси иш бошлади.
© Элина Бекназарова
UNCCD маълумотларига кўра, дунёдаги соғлом ва унумдор ерларнинг йиллик йўқотилиши тахминан 100 миллион гектарни ташкил қилади. Ушбу тенденцияни ҳисобга олган ҳолда, дунёда ер деградациясининг нейтраллигига эришиш учун 2030 йилгача 1,5 миллиард гектар майдонни тиклаш керак бўлади.
Бироқ, қўшимча таназзулни тўхтатиш ва мавжуд мажбуриятларнинг бажарилишини тезлаштириш белгиланган мақсадлардан ошиб кетиши мумкин.
Ўз навбатида, экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов президент Шавкат Мирзиёев ташаббуси билан 2021 йилда бошланган “Яшил Макон” миллий лойиҳасида Ўзбекистон эришган натижаларни қайд этди. Мазкур лойиҳанинг асосий мақсади 2030 йилга бориб республика шаҳарларида яшил майдонлар майдонини 30 фоизга етказишдан иборат.
“Ушбу ташаббус бошланганидан буён мамлакатимиз бўйлаб 416 миллион тупдан ортиқ дарахт ва бута кўчатлари экилди. 588 гектар майдонда “Яшил боғлар”, 662 гектар майдонда яшил майдонлар барпо этилди. Бухоро, Нукус, Хива ва Урганч каби заиф шаҳарлар атрофида умумий узунлиги 40 км бўлган яшил чизиқлар барпо этилди”, — деди у.
Шунингдек, у муҳофаза этиладиган табиий ҳудудлар майдони мамлакат умумий майдонига нисбатан 2016 йилдаги 4 фоиздан 14 фоизга ошганини таъкидлади.
“Бир неча ой олдин Қозоғистонда бўлганимда чанг бўронига гувоҳ бўлдим. Ўзбекистонга қайтганимдан сўнг, бу чанг бўрони аллақачон Тошкентда бўлган ва бошқа қўшни давлатларга ҳам тарқалган эди. Бу шуни кўрсатадики, Марказий Осиё – ягона экотизим ва фақат саъй-ҳаракатларимизни бирлаштириб, экологик муаммоларни биргаликда ҳал қилиш орқали биз аниқ натижаларга эришишимиз мумкин”, — дея қайд этди Абдуҳакимов.
Тадбирда 196 та мамлакатдан 500 тага яқин делегатлар, фуқаролик жамияти ва илмий доиралар вакиллари иштирок этмоқда.