ТОШКЕНТ, 5 окт — Sputnik. Ўзбекистон президенти Шавкат Мирзиёев Татаристонга етиб борди. Олий мартабали меҳмонни Абдулла Тўқай номидаги халқаро аэропортида Татаристон раиси Рустам Минниханов ва Россия саноат ва савдо вазири Денис Мантуров кутиб олди.
Шавкат Мирзиёев Татаристонга ташрифи давомида мамлакат саноат салоҳияти кўргазмасига (“Казан-Эхпо” ХКМ) ташриф буюради. “Россия – Ўзбекистон” минтақалар форуми якунлари билан танишади. Қозон шаҳридаги Б. Рамеев номидаги юқори технологиялар технопарки ва бир қатор бошқа объектларга ташриф буюради. Татаристон раиси Рустам Минниханов билан Қозон Кремлида учрашув режалаштирилган.
Эслатиб ўтамиз, Шавкат Мирзиёев Россия Федерацияси президенти Владимир Путиннинг таклифига биноан 5 октябрь куни расмий ташриф билан ушбу мамлакатда бўлади. Ташриф дастурига мувофиқ, давлат раҳбари Қозон ва Москва шаҳарларида бўлади, тор ва кенгайтирилган таркибда олий даражадаги музокаралар бўлиб ўтади. Шунингдек, Россия ҳукумати раиси Михаил Мишустин билан учрашади.