ТОШКЕНТ, 28 сен — Sputnik. Ўзбекистон президенти Шавкат Мирзиёев Германия канцлери Олаф Шольцнинг таклифига биноан Германияга жўнаб кетди, дея хабар берди давлат раҳбари матбуот хизмати.
Президент 28-30 сентябрь кунлари амалий ташриф билан Берлин шаҳрида бўлади.
Ташриф дастурига мувофиқ, Олаф Шольц ва президент Франк-Вальтер Штайнмайер билан икки томонлама музокаралар ўтказилиши, шунингдек, Марказий Осиё ва Германия давлат раҳбарларининг учрашувлари режалаштирилган.
Мамлакат етакчиси Германия иқтисодиёти Шарқий қўмитаси томонидан ташкил этиладиган ишбилармонлик тадбирларида ҳам иштирок этиши кўзда тутилган.
Кун тартибидан Ўзбекистон президентининг жорий йил май ойидаги Германияга расмий ташрифи давомида эришилган келишувларни амалга ошириш, Германиянинг етакчи компания ва банклари билан инвестициявий, инновациявий ва технологик ҳамкорликни кенгайтириш масалалари ўрин олган.
Эслатиб ўтамиз, Шавкат Мирзиёев Германия канцлери Ангела Меркелнинг таклифига биноан биринчи расмий ташриф билан 2019 йил, шу йилнинг май ойида Германия президенти Франк-Вальтер Штайнмайернинг таклифига биноан ташриф билан ушбу мамлакатда бўлган эди.