ТОШКЕНТ, 13 сен — Sputnik. Ўзбекистон халқ артисти Ёдгор Саъдиев “Ҳамдўстлик юлдузлари” мукофотига сазовор бўлди, дея хабар берди "Ўзбекконцерт".
Қирғизистоннинг Бишкек шаҳрида МДҲга аъзо давлатлар ижодкор ва илмий зиёлиларининг XVI форуми бўлиб ўтди. Унда Ёдгор Саъдиевга "Ҳамдўстлик юлдузлари” мукофоти тантанали тарзда топширилди.
Ёдгор Саъдиев “Ҳамдўстлик юлдузлари” мукофотига сазовор бўлди
© Узбекконцерт
Шунингдек, Баҳром Норбоев “Дебютлар ҳамдўстлиги” халқаро мукофоти билан тақдирланди.
Маълумот учун, ушбу мукофот 2008 йилда таъсис этилган бўлиб, 2009 йили илк бор ўз соҳибларига тақдим этилган. Мазкур мукофот маданият, санъат, таълим, илм-фан йўналишида самарали ижод қилиб келаётган, дўстлик ва ҳамжиҳатликни мустаҳкамлаш, МДҲ мамлакатларидаги маданий-гуманитар алоқаларни мустаҳкамлашга оид лойиҳаларда фаол иштироки учун берилади.
МДҲга аъзо давлатлар ижодий ва илмий зиёлиларининг XV форумига ўтган йили Тошкент шаҳри мезбонлик қилган.