ТОШКЕНТ, 8 сен — Sputnik. Ўзбекистонда жойларда саноат корхоналарини олдиндан хабардор қилмасдан электр таъминотидан узиш амалиётига қатъий чек қўйилади. Президент Шавкат Мирзиёев Энергетика вазирлигига тегишли топшириқни берди.
Давлат раҳбари раислигидаги йиғилишда ҳудудлардаги саноат корхоналари, аввало, энергия ресурслари таъминоти билан боғлиқ масалаларга алоҳида эътибор қаратиш муҳимлиги айтиб ўтилди.
Шу муносабат билан бош вазир бошчилигидаги комиссияга бир ой давомида барча ҳудудларга бориб:
- қўшимча ишлаб чиқаришни ҳисобга олган ҳолда, ойма-ой ҳудудларнинг энергия балансини ишлаб чиқиш;
- жорий йилда ишга тушадиган лойиҳаларни бирма-бир хатловдан ўтказиб, уларга зарур энергия ресурслари ажратишни назарда тутиш топширилди.
"Энергетика вазирлигига жойларда саноат корхоналарини олдиндан хабардор қилмасдан электр таъминотидан узиш амалиётига қатъий чек қўйишга топшириқ берилди", - дейилган президент матбуот хизмати хабарида.