ТОШКЕНТ, 28 авг — Sputnik. КХШТ штаб-квартирасининг кучайтирилган навбатчилик сменаси ташкилотга аъзо давлатлар қўшинлари Беларусда қандай жойлаштирилаётганини назорат қилади, деди Коллектив хавфсизлик шартномаси ташкилоти Бирлашган штаби раҳбари Анатолий Сидоров журналистлар учун ўтказилган брифингда.
Унинг сўзларига кўра, машғулотларнинг тайёргарлик босқичи аллақачон якунланган, 25 августдан эса қўшинларни қайта гуруҳлаш ишлари олиб борилмоқда.
Машқлар миллий контингентлар доимий жойлашиш пунктларига қайтгунига қадар давом этади, - деб тушунтирди генерал.
Брест, Гродно ва Минск вилоятларидаги полигон ва айрим ҳудудлардан фойдаланиш режалаштирилган. “Бресткий”, “Гожский”, “Обуз-Лесновский”, “Чепелево” полигонлари, шунингдек, Ҳарбий ҳаво кучлари ва ҳаво ҳужумидан мудофаа кучларининг 174-ўқув полигонлари шулар жумласидандир.
Машғулотлар полигонларида разведкани режалаштириш ва ўтказиш, шу жумладан дронлар ёрдамида ҳам ишлаб чиқилади. Бундан ташқари, паст баландликдан (200 метргача) қўниш, артиллерия ўқларини созлаш ва авиацияни бошқариш амалга оширилади.
"Жанговар биродарлик" доирасида бир нечта машғулотлар ўтказилади, улардан бири КХШТ радиациявий, кимёвий, биологик ҳимоя ва тиббий таъминот тузилмаларининг биргаликдаги ҳаракатларини ишлаб чиқади. Улар буни "Тўсиқ-2023" деб номлашга қарор қилишди. Бундай машғулотлар Беларус ҳудудида биринчи марта ўтказилади. Машқ давомида ҳарбийлар тақлид қилинган эпидемия вақтида беморларни эвакуация қилиш, шунингдек, тиббий лабораторияларга намуналарни етказиб бериш, оператив дезинфекция ишларини олиб боради.
Машқлар давомида улар КХШТ минтақасидаги воқеалар ривожининг эҳтимолий сценарийларини ишлаб чиқадилар.
Беларусда барча машғулотлар ўтказилмайди: хусусан, Қирғизистонда тинчликпарвар кучларнинг ҳаракатлари октябр ойида ишлаб чиқилади.
Умуман олганда, “Жанговар биродарлик”га 3700 нафаргача ҳарбий хизматчи, 700 тагача қурол ва техника жалб этилади. Жумладан, Беларусда - КХШТ давлатларидан 2,5 мингтагача ҳарбий ва 500 тагача техника ва қуроллар.
1-6 сентябр кунлари Белоруссия ҳудудида “Жанговар биродарлик-2023” қўшма тезкор-стратегик машғулотлари бўлиб ўтади. Очилиш маросими Брест қалъасида бўлиб ўтади.
Генерал Сидоровнинг сўзларига кўра, КХШТ машғулотларга Саудия Арабистони, Эрон, Хитой ва Мўғулистондан кузатувчиларни таклиф қилган.