ТОШКЕНТ, 24 авг — Sputnik. Энергетика вазирлиги ижтимоий тармоқларда метан “заправка”ларда газ нархи ошиши мумкинлиги ҳақида тарқалган хабарларга муносабат билдирди.
Таъкидланишича, барча метан "заправка"ларга август ойи учун ҳам уларнинг талабларига асосан белгиланган лимитга кўра табиий газ тўлиқ етказиб берилган. Ҳеч қандай чеклов киритилмаган.
“Қайсидир метан "заправка" ўз фаолиятини вақтинча тўхтатиб турган бўлса, демак, бу қандайдир техник сабаблар ёки бошқа бир омил туфайли бўлиши мумкин”, - дейилган хабарда.
Вазирлик метан "заправка"ларда сотиладиган бир куб газ учун белгиланган нарх ошмаганини қайд этган.
Аҳоли ва бошқа тоифадаги истеъмолчилар қонунчиликда ўрнатилган тартибда белгиланган муддатларда табиий газ нархининг оширилиши ҳақида аввалдан огоҳлантирилиши эслатилган.
“Заправка"ларда газ нархининг асоссиз оширилиши ҳолатлари юзасидан Рақобатни ривожлантириш ва истеъмолчилар ҳуқуқларини ҳимоя қилиш қўмитасининг 1159 рақамли “ишонч телефони”га қўнғироқ қилиш мумкин.