ТОШКЕНТ, 15 авг — Sputnik. Тошкент вилоятида учта МЧЖ қарийб 340 миллион сўмлик электр энергиясидан ноқонуний фойдаланиб келгани аниқланди.
Дастлабки ҳисоб-китобларга кўра, мазкур учта ҳолатда давлат манфаатларига етказилган зарар миқдири 339 млн 531 минг 760 сўм (587 минг 649 кВт·соат)ни ташкил этган.
Энергетика вазирлиги ҳузуридаги "Ўзэнергоинспекция" томонидан 15 август куни ҳуқуқни муҳофаза қилувчи органлар билан ҳамкорликда ўтказилган назорат тадбири доирасида Тошкент вилоятида электр энергиясидан ноқонуний фойдаланиш ҳолатлари аниқланди.
Хусусан:
Қуйи Чирчиқ тумани, "Сергели" МФЙда жойлашган “Sanfa Engineering Co LTD” МЧЖ электр тармоғига ноқонуний равишда уланганлиги ва бунинг натижасида давлат манфаатларига 226 млн 366 минг 296 сўм (335 минг 357 кВт·соат);
Қуйи Чирчиқ тумани, "Сергели" МФЙда жойлашган “LYXKS Transport” МЧЖ электр тармоғига ноқонуний равишда уланганлиги натижасида давлат манфаатларига 24 млн 836 минг 760 сўм (55 минг 192 кВт·соат);
Тошкент тумани, "Кенгсой" МФЙда жойлашган “Олтин Шоҳ Глобал” МЧЖ электр тармоғига ноқонуний равишда уланиб, давлат манфаатларига 88 млн 695 минг сўм (197 минг 100 кВт·соат) миқдорида зарар етказганлиги аниқланди.
Маълумот учун: ушбу ҳажмдаги электр энергияси 2 минг 938 та хонадоннинг бир ойлик истеъмолини ташкил қилади.
Ҳозирги вақтда аниқланган ҳолатлар юзасидан ҳуқуқни муҳофаза қилувчи органлар томонидан ўрнатилган тартибда суриштирув ишлари олиб борилмоқда.