ТОШКЕНТ, 1 авг — Sputnik. Ўзбекистон каолин қазиб олиш ва ундан қўшилган қиймати юқори бўлган маҳсулотлар ишлаб чиқаришни йўлга қўяди. Бу ҳақида бугун президент Шавкат Мирзиёев ҳузурида бўлиб ўтган фойдали қазилмалар мавзусидаги тақдимотда маълум бўлди.
Хабарда айтилишига кўра, бугунги кунда Ўзбекистонда каолин қазиб олиш ва қайта ишлаб бўйича қиймати 620 миллион долларлик 33 та лойиҳа амалга оширилмоқда. 2023 йилда каолин экспорти 81 миллион долларга, 2030 йилга бориб 180 миллион долларга етказиш режалаштирилган.
Йиғилишда, Ўзбекистонда янги каолин конларини топиш ва оқ каолин захирасини 200 миллион тоннага етказиш, уни қайта ишлаш лойиҳаларини кўпайтириш зарурлиги таъкидланди.
Мажлисда шунингдек, уран захирасини ўстириш мақсадида хорижий компаниялар билан ҳамкорликда геология-қидирув ишлари давом эттириш, гидротермал ва қора сланецли уран конларини ўзлаштиришга хорижий инвесторлар жалб қилиш вазифаси ҳам белгиланди.