ТОШКЕНТ, 29 июл — Sputnik. Хитойда XXXI ёзги бутунжаҳон Универсиада ўйинларининг илк мусобақалари бошланди.Бу ҳақда Ёшлар сиёсати ва спорт вазирлиги хабар берди.
Кеча Хитой Халқ Республикасининг Ченду шаҳрида XXXI ёзги бутунжаҳон Универсиада ўйинларининг тантанали очилиш маросими бўлиб ўтди. Универсиада ўйинларида дунёнинг 119 та давлатидан 5100 нафардан зиёд талаба-спортчи 18 та спорт туридаги 269 та медаллар жамланмаси учун баҳс олиб боради.
Хитойда XXXI ёзги бутунжаҳон Универсиада ўйинларининг илк мусобақалари бошланди
© Министерство молодежной политики и спорта республики Узбекистан
Миллий олимпия қўмитасига кўра, Ўзбекистон делегацияси биринчи кундаёқ дастлабки медалини қўлга киритди. Унга кўра, дзюдо беллашувларида -60 кг вазн тоифасида баҳс олиб борган Камолиддин Бахтиёров бронза медалига эга чиқди.
Камолиддин Бахтиеров
© Национальный олимпийский комитет Узбекистана
"У Универсиадада делегациянинг дастлабки медалига муаллифлик қилди", дейилади хабарда.
Мазкур Универсиада мусобақаларида Ўзбекистон талаба-спортчилари 7 та спорт турида иштирок этади.
Таэквондо спорт туридан 14 нафар, дзюдо 14, гимнастика 3, теннис 6, енгил атлетика 7, ушу 5, қиличбозлик спорт турида 20 нафар спортчи медаллар учун кураш олиб бориши белгиланган.
Бугун кун давомида 10 нафар спортчи мусобақаларда иштирок этишга киришади. Жумладан, теннис спорт турида Насиба Эсполова ва Омина Валиханова яккалик баҳсининг дастлабки босқичида иштирок этса, ушу спорт турида Даря Латишева нандао дастурида, Азиз Қахрамонов чангкуан дастурида чиқиш қилади.
Универсиада ўйинларининг дзюдо мусобақаларида Фотимахон Турсунбоева 48 килограммда, Гулхаё Жураева 52 килограммда, Юляна Максетбаева 57 килограммда, Абдурахим Нутфуллоев 66 килода медаллар учун кураш олиб боради.